ದಕ್ಷಿಣ ಕನ್ನಡ ಜಿಲ್ಲಾ ಡಿಡಿಪಿಐ ಆಗಿ ಶಶಿಧರ್‌ ಜಿ. ಎಸ್.

ಕಾರ್ಕಳ : ಶಶಿಧರ್‌ ಜಿ.ಎಸ್.‌ ‌ ಅವರು ದಕ್ಷಿಣ ಕನ್ನಡ ಶಾಲಾ ಶಿಕ್ಷಣ ಇಲಾಖೆಯ ನೂತನ ಉಪನಿರ್ದೇಶಕರಾಗಿ (ಆಡಳಿತ) ನೇಮಕಗೊಂಡಿದ್ದಾರೆ. ಮೂಲತ: ಹಾಸನ ಜಿಲ್ಲೆಯ ಅರಕಲಗೂಡು ತಾಲೂಕಿನವರಾದ ಶಶಿಧರ್‌ ಅವರು 1999ರಲ್ಲಿ ಕೆಇಎಸ್‌ ವೃಂದದಲ್ಲಿ ಶಿಕ್ಷಣ ಇಲಾಖೆಗೆ ಆಯ್ಕೆಗೊಂಡು ಆಲೂರು ತಾಲೂಕಿನ ಕದಾಳು ಸರಕಾರಿ ಪ್ರೌಢಶಾಲೆಯ ಮುಖ್ಯಶಿಕ್ಷಕರಾಗಿ ಕಾರ್ಯನಿರ್ವಹಿಸಿದ್ದರು. ಬಳಿಕ ಅರಕಲಗೂಡು ತಾಲೂಕಿನ ಬಿ.ಆರ್.ಸಿ. ಕೆಂದ್ರದ ಕ್ಷೇತ್ರ ಸಂಪನ್ಮೂಲ ಸಮನ್ವಯಾಧಿಕಾರಿಯಾಗಿ, ಚಿಕ್ಕಮಗಳೂರು ಡಯಟ್‌ ಹಿರಿಯ ಉಪನ್ಯಾಸಕರಾಗಿ, 2017ರಲ್ಲಿ ಪುತ್ತೂರು ತಾಲೂಕು ಕ್ಷೇತ್ರ ಶಿಕ್ಷಣಾಧಿಕಾರಿಯಾಗಿ, 2019-2021ರ ಅವಧಿಯಲ್ಲಿ ಕಾರ್ಕಳ ತಾಲೂಕು ಕ್ಷೇತ್ರ ಶಿಕ್ಷಣಾಧಿಕಾರಿ, ಶಿಕಾರಿಪುರ ತಾಲೂಕು ಕ್ಷೇತ್ರ ಶಿಕ್ಷಣಾಧಿಕಾರಿ ಕಾರ್ಯನಿರ್ವಹಿಸಿದ್ದರು. 2025ರವರೆಗೆ ದಕ್ಷಿಣ ಕನ್ನಡ ಜಿಲ್ಲೆಯ ಮಂಗಳೂರು ಡಯಟ್‌ ಹಿರಿಯ ಉಪನ್ಯಾಸಕರಾಗಿ ಕರ್ತವ್ಯ ಸಲ್ಲಿಸಿ, ಇದೀಗ ಡಿಡಿಪಿಐ ಆಗಿ ಭಡ್ತಿಗೊಂಡಿರುತ್ತಾರೆ.

2019ರ ಜನವರಿ 23ರಿಂದ 2021ರ ಜುಲೈ 3ರವರೆಗೆ ಕಾರ್ಕಳ ಕ್ಷೇತ್ರ ಶಿಕ್ಷಣಾಧಿಕಾರಿಯಾಗಿ ಕಾರ್ಯನಿರ್ವಹಿಸಿದ್ದ ಶಶಿಧರ್ ಸರಳತೆ‌, ಪ್ರಾಮಾಣಿಕತೆಗೆ ಹೆಸರಾಗಿದ್ದರು. ಶಿಕ್ಷಣ ಇಲಾಖೆಯಲ್ಲಿ ಸಾಕಷ್ಟು ಸುಧಾರಣೆ ತಂದಿರುವ ಅವರು ಗುರಕುಲ ಮಾದರಿಯ ಕುಟೀರ ಕಲ್ಪನೆ, ಎಸ್ಸೆಸೆಲ್ಸಿ ಮತ್ತು ಎನ್‌ಎನ್‌ಎಂಸಿ ಪರೀಕ್ಷೆಯಲ್ಲಿ ಪ್ರಗತಿ, ಗುಬ್ಬಚ್ಚಿ ಸ್ಪೋಕನ್‌ ಇಂಗ್ಲೀಷ್‌, ಮಿಷನ್‌ 100 ಅನುಷ್ಠಾನಗೊಳಿಸಿ ಕ್ರಿಯಾಶೀಲ ಬಿಇಒ ಆಗಿ ಜನಾನುರಾಗಿಯಾಗಿದ್ದರು.