ಒಬ್ಬ ವ್ಯಕ್ತಿ ತನ್ನ ಬ್ಯಾಂಕ್ ಖಾತೆಗೆ ಸಂಬಂಧಪಟ್ಟ ತನ್ನ ಸಹಿ ಹೊಂದಿರುವ ಚೆಕ್ಕನ್ನು ಕಳಕೊಂಡ ಸಂದರ್ಭದಲ್ಲಿ ಅಥವಾ ಬೇರೆ ಯಾರಾದರೂ ಆತನ ವಶದಿಂದ ಚೆಕ್ಕನ್ನು ಮೋಸ, ವಂಚನೆ ಅಥವಾ ಕಳವು ಮಾಡುವ ಮೂಲಕ ಅನಧಿಕೃತವಾಗಿ ತನ್ನ ವಶ ಇರಿಸಿಕೊಂಡು ಚೆಕ್ಕಿಗೆ ಸಂಬಂಧಪಟ್ಟ ವ್ಯಕ್ತಿಗೆ ಬೆದರಿಕೆ ಒಡ್ಡುವ ಅಥವಾ ಬ್ಲ್ಯಾಕ್ಮೇಲ್ ಮಾಡುತ್ತಿರುವ ಸಂಧರ್ಭದಲ್ಲಿ ವಿವಾದಿತ ಚೆಕ್ಕನ್ನು ಸಂಬಂಧಪಟ್ಟ ಬ್ಯಾಂಕಿಗೆ ನಗದೀಕರಣಕ್ಕಾಗಿ ಹಾಜರು ಪಡಿಸುವುದಕ್ಕಿಂತ ಮುಂಚಿತವಾಗಿ ಚೆಕ್ಕಿನ ಖಾತೆಗೆ ಸಂಬಂಧಪಟ್ಟ ಬ್ಯಾಂಕಿಗೆ ಸದರಿ ಚೆಕ್ಕನ್ನು ನಗದೀಕರಣಕ್ಕಾಗಿ ಸ್ವೀಕರಿಸದಂತೆ ಕೋರಿ ಲಿಖಿತ ಪತ್ರವನ್ನು ನೀಡಿ ಆ ಕೂಡಲೇ ಸ್ಥಳೀಯ ಪೋಲೀಸರಿಗೆ ಸಹಾ ಲಿಖಿತವಾದ ದೂರನ್ನು ನೀಡಿ ಈ ರೀತಿಯ ಕ್ರಮ ಕೈಗೊಂಡ ಬಗ್ಗೆ ಸೂಕ್ತ ರಶೀದಿ ಅಥವಾ ದಾಖಲೆಯನ್ನು ಇಟ್ಟುಕೊಳ್ಳುವುದು ಅವಶ್ಯಕವಾಗಿರುತ್ತದೆ. ಒಂದು ವೇಳೆ ಈ ರೀತಿಯಾಗಿ ಕಳಕೊಂಡ ಚೆಕ್ಕು ಯಾರ ವಶ ಇದೆ ಎಂಬ ಬಗ್ಗೆ ಮಾಹಿತಿಯನ್ನು ಚೆಕ್ಕಿಗೆ ಸಂಬಂಧಪಟ್ಟ ವ್ಯಕ್ತಿ ಹೊಂದಿರುವ ಪಕ್ಷದಲ್ಲಿ ಅಂತಹ ವ್ಯಕ್ತಿಗೆ ಚೆಕ್ಕನ್ನು ದುರುಪಯೋಗ ಪಡಿಸದೆ ಅಥವಾ ನಗದೀಕರಣಕ್ಕಾಗಿ ಬ್ಯಾಂಕಿಗೆ ಹಾಜರು ಪಡಿಸದಂತೆ ಲಿಖಿತವಾಗಿ ತಿಳಿಸುವುದು ಸಹಾ ಅವಶ್ಯಕವಾಗಿರುತ್ತದೆ. ಕಾರಣ ಮುಂದೆ ವಿವಾದಿತ ಚೆಕ್ಕಿಗೆ ಸಂಬಂಧಪಟ್ಟ ಚೆಕ್ಕ್ ಬೌನ್ಸ್ ಪ್ರಕರಣದ ವಿಚಾರಣೆಯ ಸಂದರ್ಭದಲ್ಲಿ ನ್ಯಾಯಾಲಯದಲ್ಲಿ ಚೆಕ್ಕ್ ಕಳಕೊಂಡ ವ್ಯಕ್ತಿಯು ತಾನು ಸಹಿ ಮಾಡಿರುವ ಚೆಕ್ಕು ದೂರುದಾರನ ವಶ ಪ್ರತಿಫಲ ರಹಿತವಾಗಿ ಯಾವ ಕಾರಣದಿಂದ ಮತ್ತು ಹೇಗೆ ಸೇರಿರುತ್ತದೆ ಮತ್ತು ದೂರುದಾರ ತನ್ನ ಚೆಕ್ಕನ್ನು ಯಾವ ರೀತಿಯಾಗಿ ದುರುಪಯೋಗ ಪಡಿಸಿಕೊಂಡಿರುತ್ತಾನೆ ಮತ್ತು ಯಾವ ಕಾರಣಕ್ಕಾಗಿ ತಾನು ನಿರಪರಾಧಿ ಎಂಬ ನಿಲುವನ್ನು ಸಮರ್ಥಿಸಿಕೊಳ್ಳಬೇಕಾಗಿರುವುದು ಪ್ರತಿಯೊಬ್ಬ ವ್ಯಕ್ತಿಯ ಅಂದರೆ ಆರೋಪಿತನ ಹೊಣೆಗಾರಿಕೆಯಾಗಿರುತ್ತದೆ ಮತ್ತು ಈ ಬಗ್ಗೆ ಸೂಕ್ತ ನಂಬಲು ಅರ್ಹವಾದ ಸಾಕ್ಷ್ಯಾಧಾರವನ್ನು ನ್ಯಾಯಾಲಯಕ್ಕೆ ಒದಗಿಸುವುದು ಆರೋಪಿತನ ಅಂದರೆ ಚೆಕ್ಕನ್ನು ಕಳೆದುಕೊಂಡ ವ್ಯಕ್ತಿಯ ಮುಖ್ಯ ಜವಾಬ್ದಾರಿಯಾಗಿರುತ್ತದೆ.
ಈ ರೀತಿಯಾಗಿ ಆರೋಪಿತನು ತನ್ನ ರಕ್ಷಣಾತ್ಮಕ ನಿಲುವನ್ನು ಅಥವಾ ವಾದವನ್ನು ಸಮರ್ಥಿಸಿಕೊಳ್ಳಲು ಆತ ಸೂಕ್ತ ದಾಖಲೆಯನ್ನು ನ್ಯಾಯಾಲಯಕ್ಕೆ ಒದಗಿಸಬೇಕಾಗುತ್ತದೆ. ಈ ಸಂದರ್ಭದಲ್ಲಿ ಆರೋಪಿ ತನಗೆ ಬೇಕಾಗುವ ಮಹತ್ವದ ದಾಖಲೆಗಳನ್ನು ಇತರರ ಸುಪರ್ಧಿಯಿಂದ ನ್ಯಾಯಾಲಯದ ಅದೇಶದ ಮೂಲಕ ನ್ಯಾಯಾಲಯಕ್ಕೆ ತರಿಸಿ ತನ್ನ ರಕ್ಷಣಾತ್ಮಕ ನಿಲುವನ್ನು ಸಮರ್ಥಿಸಿಕೊಳ್ಳುವ ಹಕ್ಕನ್ನು ಹೊಂದಿರುತ್ತಾನೆ. ಮಾತ್ರವಲ್ಲದೇ ತನ್ನ ಅಥವಾ ತನಗೆ ಸಂಬಂಧಪಟ್ಟ ಚೆಕ್ಕಿನ ವಾಸ್ತವಿಕತೆಯಲ್ಲಿ ಅಂದರೆ ಚೆಕ್ಕಿನಲ್ಲಿರುವ ಸಹಿ ಮತ್ತು ಇತರ ಬರಹದಲ್ಲಿ ಉಂಟಾಗಿರುವ ಶಾಯಿಯ ವ್ಯತ್ಯಾಸ, ಅವಧಿಯ ವ್ಯತ್ಯಾಸ ಅಥವಾ ಆರೋಪಿಯ ಸಹಿಯನ್ನು ಫೋರ್ಜರಿ ಆಗಿರುವ ಸಂದರ್ಭದಲ್ಲಿ ಆರೋಪಿ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿ ಸಂಬಂಧಪಟ್ಟ ಕೈಬರಹ ತಜ್ಞರ ಅಭಿಪ್ರಾಯ ಕುರಿತು ವರದಿಯನ್ನು ತರಿಸಿಕೊಂಡು ತನ್ನ ರಕ್ಷಣಾತ್ಮಕ ನಿಲುವನ್ನು ಸಮರ್ಥಿಸಿಕೊಳ್ಳುವ ಹಕ್ಕನ್ನು ಹೊಂದಿರುತ್ತಾನೆ.
ಚೆಕ್ಕು ಅಮಾನ್ಯಗೊಂಡ ಸಂದರ್ಭದಲ್ಲಿ ಚೆಕ್ಕು ಹೊಂದಿರುವ ವ್ಯಕ್ತಿ ಚೆಕ್ಕು ನೀಡಿದಾತನಿಗೆ ಅಥವಾ ಚೆಕ್ಕಿಗೆ ಸಂಬಂಧಪಟ್ಟ ಬ್ಯಾಂಕ್ ಖಾತೆ ಹೊಂದಿರುವ ವ್ಯಕ್ತಿಗೆ ನೀಡುವ ಯಾವುದೇ ನೋಟೀಸಿಗೆ ನೋಟೀಸು ಪಡೆದ ವ್ಯಕ್ತಿ ಆ ಕೂಡಲೇ ತನ್ನ ವಕೀಲರನ್ನು ಸಂಪರ್ಕಿಸಿ ಸೂಕ್ತ ಜವಾಬನ್ನು ನೀಡುವುದು ಅವಶ್ಯಕವಾಗಿರುತ್ತದೆ. ಏಕೆಂದರೆ ಈ ರೀತಿಯ ನೋಟೀಸಿಗೆ ಉತ್ತರ ಕೊಡದೇ ಇದ್ದಾಗ ಚೆಕ್ಕು ನೀಡಿದ ವ್ಯಕ್ತಿ ಅಥವಾ ಚೆಕ್ಕಿಗೆ ಸಂಬಂಧಪಟ್ಟ ಬ್ಯಾಂಕ್ ಖಾತೆ ಹೊಂದಿರುವ ವ್ಯಕ್ತಿಯು ಮುಂದೆ ನ್ಯಾಯಾಲಯದಲ್ಲಿ ತನ್ನ ರಕ್ಷಣಾತ್ಮಕ ವಾದವನ್ನು ಅಥವಾ ನಿಲುವನ್ನು ಸಮರ್ಥಿಸಿಕೊಳ್ಳುವ ಹಕ್ಕನ್ನು ಕಳೆದುಕೊಳ್ಳುತ್ತಾನೆ ಮಾತ್ರವಲ್ಲದೆ ಚೆಕ್ಕು ವ್ಯವಹಾರಕ್ಕೆ ಸಂಬಂಧಪಟ್ಟ ‘ವರ್ಗಾವಣೆ ಲಿಖಿತ ಪತ್ರಗಳ ಕಾಯ್ದೆ’ ಪ್ರಕಾರ ಚೆಕ್ಕು ಹೊಂದಿರುವ ವ್ಯಕ್ತಿ ಅಂದರೆ ಚೆಕ್ ಧಾರಕನು ನೀಡಿರುವ ನೋಟೀಸಿನ ಅಂಶಗಳನ್ನು ಸಂಪೂರ್ಣವಾಗಿ ಒಪ್ಪಿಕೊಂಡಂತೆ ಎನ್ನುವ ಪೂರ್ವ ಭಾವನೆ ಮೂಡುತ್ತದೆ. ಚೆಕ್ಕ್ ಬೌನ್ಸ್ ಪ್ರಕರಣದಲ್ಲಿ ಆರೋಪಿ ನ್ಯಾಯಾಲಯದಿಂದ ಸಮನ್ಸ್ ಸ್ವೀಕರಿಸಿದ ಸಂದರ್ಭದಲ್ಲಿ ಆರೋಪಿಯು ಸಮನ್ಸ್ನಲ್ಲಿ ನಿಗದಿಪಡಿಸಿರುವ ದಿನಾಂಕದಂದು ತನ್ನ ವಕೀಲರ ಮೂಲಕ ಹಾಜರಾಗಿ ಸೂಕ್ತವಾದ ಮುಚ್ಚಳಿಕೆಯನ್ನು ನ್ಯಾಯಾಲಯದ ಶರ್ತಗಳಿಗನುಸಾರವಾಗಿ ನೀಡಿ ಸೂಕ್ತ ಜಾಮೀನನ್ನು ಪಡೆಯುವುದು ಅವಶ್ಯಕವಾಗಿರುತ್ತದೆ. ಇಲ್ಲವಾದಲ್ಲಿ ನ್ಯಾಯಾಲಯವು ಆರೋಪಿಯ ವಿರುದ್ಧ ಜಾಮೀನುರಹಿತ ವಾರಂಟನ್ನು ಹೊರಡಿಸಿ ಪೋಲೀಸರ ಮೂಲಕ ಆತನನ್ನು ಬಂಧಿಸಿ ನ್ಯಾಯಾಲಯಕ್ಕೆ ಹಾಜರು ಪಡಿಸುವ ಕಾನೂನು ಪ್ರಕ್ರಿಯೆಯನ್ನು ನಡೆಸಬೇಕಾಗುತ್ತದೆ.
