174 ಪ್ರಯಾಣಿಕರಿದ್ದ ವಿಮಾನವನ್ನು ಪತನಗೊಳಿಸಲು ವಿಫಲ ಯತ್ನ ನಡೆಸಿದ್ದ ಸಹ ಪೈಲಟ್
ದುಬೈ : ದುಬೈನಿಂದ ಇಸ್ರೇಲ್‌ನ ಟೆಲ್ ಅವೀವ್‌ಗೆ ತೆರಳುತ್ತಿದ್ದ ಫ್ಲೈದುಬೈ ವಿಮಾನದ ಪೈಲಟ್ ಸ್ಮಿತ್ ಮಚ್ಛರ್ ಅವರ ಮೇಲೆ ಹಲ್ಲೆ ನಡೆಸಿ, ವಿಮಾನವನ್ನು ಪತನಗೊಳಿಸಲು ಯತ್ನಿಸಿದನೆನ್ನಲಾದ ಫ್ಲೈದುಬೈ ಸಹ-ಪೈಲಟ್ ಹೆಸರು ಕೊನೆಗೂ ಬಹಿರಂಗವಾಗಿದೆ. ಈ ಸಹ-ಪೈಲಟ್‌ನನ್ನು ಓಮಾನ್ ಪ್ರಜೆ ಹಮಾಮ್ ಅಲ್-ಹಮ್ಮಾಮಿ ಎಂದು ಗುರುತಿಸಲಾಗಿದೆ. ಈತನ ಹೆಸರು ಇಷ್ಟರ ತನಕ ಬಹಿರಂಗವಾಗದೇ ಇರುವುದು ಅನೇಕ ರೀತಿಯ ಊಹಾಪೋಹಗಳಿಗೆ ಕಾರಣವಾಗಿತ್ತು.
ತನ್ನ ಸಿದ್ಧಾಂತದ ದೃಷ್ಟಿಕೋನಗಳ ಕುರಿತಾದ ಕಳವಳಗಳಿಂದಾಗಿ ಹಿಂದೆ ಓಮಾನ್‌ನಲ್ಲಿ ವಿಮಾನ ಹಾರಾಟದಿಂದ ನಿಷೇಧಿಸಲ್ಪಟ್ಟಿದ್ದನು ಎಂದು ವರದಿಗಳು ತಿಳಿಸಿವೆ. ಈತನನ್ನು ಫ್ಲೈದುಬೈ ನೇಮಿಸಿಕೊಳ್ಳುವ ಮೊದಲು ಓಮಾನ್ ಅಧಿಕಾರಿಗಳು ವಿಮಾನ ಹಾರಾಟದಿಂದ ನಿರ್ಬಂಧಿಸಿದ್ದರು ಎಂದು ವರದಿ ತಿಳಿಸಿದೆ.
ಈತನ ಮತಾಂಧತೆಯ ನಿಖರ ಸ್ವರೂಪ ಏನೆಂಬುದು ಇನ್ನೂ ದೃಢಪಟ್ಟಿಲ್ಲ. ಭದ್ರತೆಗೆ ಅಪಾಯವೆಂದು ಗುರುತಿಸಲ್ಪಟ್ಟ ನಂತರವೂ ಈ ಸಹಪೈಲಟ್‌ಗೆ ಈತನಿಗೆ ಇಸ್ರೇಲ್‌ಗೆ ಹೋಗುವ ವಿಮಾನದಲ್ಲಿ ನೌಕರಿ ಹೇಗೆ ಸಿಕ್ಕಿತು ಎಂಬ ಪ್ರಶ್ನೆಗೆ ಇನ್ನೂ ಉತ್ತರ ಸಿಕ್ಕಿಲ್ಲ.
ಇಸ್ರೇಲ್‌ನಲ್ಲಿ ವಿಮಾನವನ್ನು ಪತನಗೊಳಿಸುವ ಉದ್ದೇಶ ತನಗಿತ್ತು ಎಂದು ಸಹ-ಪೈಲಟ್ ತನಿಖಾಧಿಕಾರಿಗಳಿಗೆ ತಿಳಿಸಿದ್ದಾನೆ ಎಂದು ತನಿಖೆಯಿಂದ ಬಹಿರಂಗಗೊಂಡಿದೆ ಎಂದು ಮೂಲಗಳು ತಿಳಿಸಿವೆ.
ಸೆಪ್ಟೆಂಬರ್ 30 ರಂದು 170 ಕ್ಕೂ ಹೆಚ್ಚು ಪ್ರಯಾಣಿಕರು ಮತ್ತು ಸಿಬ್ಬಂದಿಯೊಂದಿಗೆ ದುಬೈನಿಂದ ಟೆಲ್ ಅವೀವ್‌ಗೆ ಹೊರಟಿದ್ದ ಫ್ಲೈದುಬೈ ವಿಮಾನ FZ 1073 ರಲ್ಲಿದ್ದಾಗ ಸಹ-ಪೈಲಟ್ ನಾಯಕ ಪೈಲಟ್ ಮೇಲೆ ಹಲ್ಲೆ ನಡೆಸಿ ಗಾಯಗೊಳಿಸಿದ್ದಾನೆ. ಇದು ಕಾಕ್‌ಪಿಟ್‌ನಲ್ಲಿ ನಾಟಕೀಯ ತುರ್ತು ಪರಿಸ್ಥಿತಿಯನ್ನು ಸೃಷ್ಟಿಸಿತು. ಸೌದಿ ಅರೇಬಿಯಾ ಮೇಲೆ ಹಾರುತ್ತಿದ್ದಾಗ ವಿಮಾನವು ಹಠಾತ್ ತೀವ್ರ ತಿರುವನ್ನು ಪಡೆದುಕೊಂಡು ಎರಡು ಬಾರಿ ಕೆಳಕ್ಕೆ ಧುಮುಕಿದೆ. ಅತ್ಯಂತ ಕೆಳಮಟ್ಟಕ್ಕೆ ಇಳಿಕೆಯ ಸಮಯದಲ್ಲಿ, ವಿಮಾನವು ಕೇವಲ 30 ಸೆಕೆಂಡುಗಳಲ್ಲಿ 16,000 ಅಡಿಗಳಿಗೂ ಹೆಚ್ಚು ಎತ್ತರವನ್ನು ಕಳೆದುಕೊಂಡಿತು.
ನಂತರ ವಿಮಾನ ತುರ್ತು ಸಂಕೇತಗಳನ್ನು ರವಾನಿಸಿತು ಮತ್ತು ಇಸ್ರೇಲ್‌ಗೆ ಮುಂದುವರಿಯುವ ಬದಲು ವಾಯುವ್ಯ ಸೌದಿ ಅರೇಬಿಯಾದ ತಬುಕ್‌ಗೆ ತಿರುಗಿಸಲ್ಪಟ್ಟಿತು. ತುರ್ತು ಸಂದರ್ಭದಲ್ಲಿ ಗಾಯಗೊಂಡ ಪೀಲಟ್‌ ಸ್ಮಿತ್ ಮಚ್ಚರ್‌ ಕಾಕ್‌ಪಿಟ್ ಬಾಗಿಲು ತೆರೆಯಲು ಶಕ್ತರಾಗಿದ್ದು, ಇದರಿಂದ ಪ್ರಯಾಣಿಕರು ಮಧ್ಯಪ್ರವೇಶಿಸಲು ಸಾಧ್ಯವಾಯಿತು ಎಂದು ಇಸ್ರೇಲಿ ಅಧಿಕಾರಿಗಳು ತಿಳಿಸಿದ್ದಾರೆ.
ಹಲವಾರು ಪ್ರಯಾಣಿಕರು ಕಾಕ್‌ಪಿಟ್‌ಗೆ ನುಗ್ಗಿ ಸಹ-ಪೈಲಟ್ ಅನ್ನು ಹತೋಟಿಗೆ ತಂದರು. ವೈದ್ಯರೊಬ್ಬರು ಗಾಯಗೊಂಡ ಪೈಲಟ್‌ಗೆ ಚಿಕಿತ್ಸೆ ನೀಡುತ್ತಿರುವಾಗ, ಆತನನ್ನು ಕೇಬಲ್‌ಗಳಿಂದ ಕಟ್ಟಿಹಾಕಲಾಗಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.
ಅದೇ ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದಇಬ್ಬರು ಫ್ಲೈದುಬೈ ಪೈಲಟ್‌ಗಳು ನಂತರ ವಿಮಾನದ ನಿಯಂತ್ರಣವನ್ನು ವಹಿಸಿಕೊಂಡು ಸೌದಿಯ ತಬುಕ್‌ನಲ್ಲಿ ಸುರಕ್ಷಿತವಾಗಿ ಭೂಸ್ಪರ್ಶ ಮಾಡಲು ಸಹಾಯ ಮಾಡಿದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
