ನವದೆಹಲಿ: ಕಂದಾಯ ಗುಪ್ತಚರ ನಿರ್ದೇಶನಾಲಯದ ಮಹತ್ವದ ಕಾರ್ಯಾಚರಣೆಯಲ್ಲಿ ಭಾರತ – ಮಯನ್ಮಾರ್ ಗಡಿಯ ಮೂಲಕ ಅಕ್ರಮ ವಿದೇಶಿ ಸಿಗರೇಟುಗಳನ್ನು ಸಾಗಿಸುತ್ತಿದ್ದ ಜಾಲ ಬಲೆಗೆ ಬಿದ್ದಿದೆ.
ಮಿಜೋರಾಂನಲ್ಲಿ ನಡೆಸಿದ ದಾಳಿಯಲ್ಲಿ 8.64 ಕೋಟಿ ಮೌಲ್ಯದ 43.2 ಲಕ್ಷ ವಿದೇಶಿ ಸಿಗರೇಟ್‌ಗಳನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ. ಈ ಸರಕನ್ನು ಮ್ಯಾನ್ಮಾರ್‌ನಿಂದ ಕಳ್ಳಸಾಗಣೆ ಮಾಡಿರುವ ಶಂಕೆ ವ್ಯಕ್ತವಾಗಿದ್ದು, ಪ್ರಕರಣಕ್ಕೆ ಸಂಬಂಧಿಸಿದಂತೆ ಲಾರಿ ಚಾಲಕನನ್ನು ವಶಕ್ಕೆ ಪಡೆಯಲಾಗಿದೆ.
ಐಜ್ವಾಲ್‌ನತ್ತ ದೊಡ್ಡ ಪ್ರಮಾಣದ ವಿದೇಶಿ ಸಿಗರೇಟ್‌ಗಳನ್ನು ಸಾಗಿಸಲಾಗುತ್ತಿದೆ ಎಂಬ ಖಚಿತ ಮಾಹಿತಿಯ ಹಿನ್ನೆಲೆಯಲ್ಲಿ DRI ಅಧಿಕಾರಿಗಳು ಚಾಂಫೈ-ಐಜ್ವಾಲ್‌ ರಸ್ತೆಯಲ್ಲಿ ನಿಗಾ ಇರಿಸಿದ್ದರು. ಈ ವೇಳೆ ತುಯಿರಿಯಾಲ್ ಗ್ರಾಮದ ಬಳಿ ಅನುಮಾನಾಸ್ಪದ ಲಾರಿಯನ್ನು ತಡೆದು ಪರಿಶೀಲನೆ ನಡೆಸಿದರು. ಲಾರಿಯನ್ನು ಸಂಪೂರ್ಣವಾಗಿ ತಪಾಸಣೆ ಮಾಡಿದಾಗ, ‘ಪ್ಯಾಟ್ರನ್’ (Patron) ಬ್ರಾಂಡ್‌ನ ವಿದೇಶಿ ಸಿಗರೇಟ್‌ಗಳನ್ನು ಹೊಂದಿದ್ದ 432 ಪೆಟ್ಟಿಗೆಗಳು ಪತ್ತೆಯಾಗಿವೆ. ಇವುಗಳಲ್ಲಿ ಒಟ್ಟು 43,20,000 ಸಿಗರೇಟ್‌ಗಳಿದ್ದವು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಸಿಗರೇಟ್‌ಗಳ ಜೊತೆಗೆ ಸಾಗಣೆ ಮಾಡುತ್ತಿದ್ದ ಲಾರಿಯನ್ನೂ ಕಸ್ಟಮ್ಸ್ ಕಾಯ್ದೆ 1962ರ ಸೆಕ್ಷನ್‌ 110ರ ಅಡಿಯಲ್ಲಿ ವಶಪಡಿಸಿಕೊಳ್ಳಲಾಗಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಚಾಲಕನನ್ನು ಬಂಧಿಸಿ ತನಿಖೆ ಮುಂದುವರಿಸಲಾಗಿದೆ. ಪ್ರಾಥಮಿಕ ತನಿಖೆಯ ಪ್ರಕಾರ, ಮಿಜೋರಾಂ-ಮ್ಯಾನ್ಮಾರ್ ಗಡಿಯ ಜೊಖಾಲ್ತಾ‌ರ್ ವಲಯದ ಮೂಲಕ ಸಿಗರೇಟ್‌ಗಳನ್ನು ರಾಜ್ಯಕ್ಕೆ ಅಕ್ರಮವಾಗಿ ತರಲಾಗಿದೆ ಎಂಬ ಶಂಕೆಯಿದ್ದು, ಅಧಿಕಾರಿಗಳು ತನಿಖೆ ಮುಂದುವರಿಸಿದ್ದಾರೆ.
