ಕಟ್ಟಡ ನಿರ್ಮಾಣ ಕ್ಷೇತ್ರದಲ್ಲಿ ತೊಡಗಿಸಿಕೊಂಡಿದ್ದ ಓರ್ವ ಸಾಮಾನ್ಯ ಇಂಜಿನಿಯರ್, ಇಂದು ಸಿವಿಲ್ ತಂತ್ರಜ್ಞಾನದ ಬೃಹತ್ ಸಾಮ್ರಾಜ್ಯವನ್ನೇ ಸೃಷ್ಟಿಸಿದ ರೋಚಕ ಕಥೆಯಿದು. ಪ್ರಾರಂಭದಲ್ಲಿ ಕಾರ್ಕಳದ ಪರಿಸರದಲ್ಲಿ ಸಣ್ಣಪುಟ್ಟ ಮನೆ ಹಾಗೂ ವಾಣಿಜ್ಯ ಸಂಕೀರ್ಣಗಳ ನಿರ್ಮಾಣದಲ್ಲಿ ಮಗ್ನರಾಗಿದ್ದ ಅವರು, ಇಂದು ಸಾವಿರಾರು ಕೋಟಿ ರೂಪಾಯಿಗಳ ಬೃಹತ್ ಕಾಮಗಾರಿಗಳ ಗುತ್ತಿಗೆಯನ್ನು ಯಶಸ್ವಿಯಾಗಿ ನಿರ್ವಹಿಸುವ ಹಂತಕ್ಕೆ ಬೆಳೆದಿದ್ದಾರೆ. ಕರ್ನಾಟಕದ ಮುಂಚೂಣಿ ಗುತ್ತಿಗೆದಾರರಲ್ಲಿ ಒಬ್ಬರಾಗಿ ಹೆಮ್ಮೆಯಿಂದ ಗುರುತಿಸಿಕೊಂಡಿರುವ ಇವರೇ ಎಸ್ಕೆಎಸ್ ಇನ್ಫ್ರಾ ಪ್ರಾಜೆಕ್ಟ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯ ಆಡಳಿತ ನಿರ್ದೇಶಕರಾದ ಸುಜಯ ಕುಮಾರ್ ಶೆಟ್ಟಿ
ನಿಖರತೆ, ಕ್ರಮಬದ್ಧತೆ, ಅಚಲ ಕಾರ್ಯತತ್ಪರತೆ ಮತ್ತು ಶ್ರೇಷ್ಠ ಗುಣಮಟ್ಟವೇ ಎಸ್ಕೆಎಸ್ ಸಂಸ್ಥೆಯನ್ನು ಯಶಸ್ಸಿನ ಶಿಖರಕ್ಕೇರಿಸಿದೆ. ತಾಳ್ಮೆ, ಕಠಿಣ ಪರಿಶ್ರಮ, ವೃತ್ತಿ ನಿಷ್ಠೆ, ವಿನಯವಂತಿಕೆ ಹಾಗೂ ಸಜ್ಜನಿಕೆಗಳೇ ಸುಜಯ ಶೆಟ್ಟಿ ಅವರ ಅಪ್ರತಿಮ ವ್ಯಕ್ತಿತ್ವದ ಮೈಲಿಗಲ್ಲುಗಳು. 1999ರಲ್ಲಿ ಆರಂಭವಾದ ಇವರ ಕನಸಿನ ‘ಎಸ್ಕೆಎಸ್’ ಸಂಸ್ಥೆ, ಇಂದು ಸಾವಿರಾರು ಕುಟುಂಬಗಳಿಗೆ ಆಸರೆಯಾಗಿ ಉದ್ಯೋಗದ ಬೆಳಕು ನೀಡಿದೆ.
ಶೈಕ್ಷಣಿಕ ಹಿನ್ನೆಲೆ – ಉದ್ಯಮದ ಹೆಜ್ಜೆಗುರುತು
ಕಾರ್ಕಳ ತಾಲೂಕಿನ ಜಾರ್ಕಳದ ಸುಜಯ ಶೆಟ್ಟಿ ಅವರು, ಪ್ರಸಿದ್ಧ ಮಣಿಪಾಲದ ಎಂ.ಐ.ಟಿ (MIT) ಸಂಸ್ಥೆಯಲ್ಲಿ ಸಿವಿಲ್ ಇಂಜಿನಿಯರಿಂಗ್ ಪದವಿ ಪೂರೈಸಿದ ತಕ್ಷಣವೇ ಸಿವಿಲ್ ಕ್ಷೇತ್ರದಲ್ಲಿ ಸಕ್ರಿಯರಾದರು. ಆರಂಭಿಕ ಸಣ್ಣಪುಟ್ಟ ಕಾಮಗಾರಿಗಳ ಅನುಭವದೊಂದಿಗೆ ಮುನ್ನಡೆದ ಅವರಿಗೆ 2011ರಲ್ಲಿ ದೊಡ್ಡ ತಿರುವು ಸಿಕ್ಕಿತು. ಕಾರ್ಕಳದ ಜ್ಞಾನಸುಧಾ ಕಾಲೇಜು ಹಾಗೂ ಮಣಿಪಾಲ ಐಟಿಐ ಕಟ್ಟಡ ನಿರ್ಮಾಣದ ಬೃಹತ್ ಜವಾಬ್ದಾರಿಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ ಇವರು, ಆ ಬಳಿಕ ರಾಜ್ಯದ ಬೃಹತ್ ಮೂಲಸೌಕರ್ಯ ಯೋಜನೆಗಳತ್ತ ವಿಶ್ವಾಸದ ಹೆಜ್ಜೆಯಿಟ್ಟರು.
ಅಚಲ ದೈವಭಕ್ತಿ ಮತ್ತು ನಿಸ್ವಾರ್ಥ ದೇವಸ್ಥಾನ ಜೀರ್ಣೋದ್ಧಾರ
ಸುಜಯ ಶೆಟ್ಟಿ ಅವರಿಗೆ ದೇವರ ಮೇಲೆ ಅಪಾರ ಭಕ್ತಿ ಹಾಗೂ ಅಚಲ ನಂಬಿಕೆ. ಎಷ್ಟೇ ಬ್ಯುಸಿಯಾಗಿದ್ದರೂ ಊರಿನಲ್ಲಿದ್ದಾಗ ಪ್ರತಿದಿನ ಕಾರ್ಕಳದ ಶ್ರೀ ವೆಂಕಟರಮಣ ದೇವಸ್ಥಾನ, ಸೋಮವಾರ ಪೆರ್ವಾಜೆ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ, ಮಂಗಳವಾರ ಮಾರಿಗುಡಿ, ಬುಧವಾರ ಶ್ರೀ ಮೂಡುಮಹಾಗಣಪತಿ ದೇವಸ್ಥಾನ ಮತ್ತು ಗುರುವಾರ ರಾಘವೇಂದ್ರ ಮಠಕ್ಕೆ ಭೇಟಿ ನೀಡಿ ದೇವರ ದರ್ಶನ ಪಡೆಯುವುದು ಅವರ ದೈನಂದಿನ ಧಾರ್ಮಿಕ ನಿಯಮ.
ರಾಜ್ಯದ ಯಾವುದೇ ಮೂಲೆಯಲ್ಲಿ ದೇವಸ್ಥಾನಗಳ ಜೀರ್ಣೋದ್ಧಾರದ ಕಾರ್ಯ ಪ್ರಸ್ತಾಪವಾದಾಗ, ಜೀರ್ಣೋದ್ಧಾರ ಸಮಿತಿಗೆ ಮೊದಲು ನೆನಪಾಗುವುದೇ ಸುಜಯ ಕುಮಾರ್ ಶೆಟ್ಟಿ. ಏಕೆಂದರೆ, ಒಪ್ಪಿಕೊಂಡ ಕಾರ್ಯವನ್ನು ನಿಗದಿತ ಅವಧಿಗಿಂತ ಮುಂಚಿತವಾಗಿಯೇ, ಅತ್ಯಂತ ಮುತುವರ್ಜಿಯಿಂದ ಕಲಾತ್ಮಕವಾಗಿ ಪೂರ್ಣಗೊಳಿಸುವುದು ಇವರ ವಿಶಿಷ್ಟ ಶೈಲಿ. ದೇವಸ್ಥಾನಗಳ ಪುನರುತ್ಥಾನದ ಕಾರ್ಯದಲ್ಲಿ ಲಾಭ-ನಷ್ಟದ ಲೆಕ್ಕಾಚಾರವನ್ನೇ ನೋಡದ ಇವರು, ಅದನ್ನು ಭಗವಂತ ತನಗೆ ಒಪ್ಪಿಸಿದ ಪವಿತ್ರ ಸೇವೆ ಎಂದು ಭಾವಿಸಿ ಅತ್ಯಂತ ಶ್ರದ್ಧೆಯಿಂದ ಕೈಗೆತ್ತಿಕೊಳ್ಳುತ್ತಾರೆ.
ಯಶಸ್ವಿ ಧಾರ್ಮಿಕ ಕಾಮಗಾರಿಗಳು
2006ರಲ್ಲಿ ನಿಟ್ಟೆ ವಿಷ್ಣುಮೂರ್ತಿ ದೇವಸ್ಥಾನದಿಂದ ಇವರ ಭಕ್ತಿ ಸೇವೆ ಆರಂಭವಾಯಿತು. ಕಾರ್ಕಳ ಶ್ರೀ ಮಾರಿಯಮ್ಮ ದೇವಸ್ಥಾನ (ಕೇವಲ 11 ತಿಂಗಳಲ್ಲಿ ಪೂರ್ಣ), ಕಾಪು ಮಾರಿಗುಡಿ ದೇವಸ್ಥಾನ, ಹೊಸಪೇಟೆ ಹುಲಿಗಮ್ಮ ದೇವಸ್ಥಾನ ಹಾಗೂ ಇತ್ತೀಚೆಗೆ ಪಡುಬಿದ್ರಿ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನದ ಜೀರ್ಣೋದ್ಧಾರವನ್ನು ಕೇವಲ 11 ತಿಂಗಳಲ್ಲಿ ಅದ್ಭುತವಾಗಿ ಪೂರ್ಣಗೊಳಿಸಿ ಇತಿಹಾಸ ನಿರ್ಮಿಸಿದ್ದಾರೆ. “ಇದೆಲ್ಲವೂ ದೇವರ ಅನುಗ್ರಹದಿಂದ ಮಾತ್ರ ಸಾಧ್ಯ” ಎನ್ನುವುದು ಅವರ ವಿನಮ್ರ ನುಡಿ.
ಪ್ರಚಾರ ಬಯಸದ ವಿನಯವಂತಿಕೆ
ದೇವಸ್ಥಾನಗಳ ಭವ್ಯ ಜೀರ್ಣೋದ್ಧಾರ ಕಾರ್ಯವನ್ನು ಯಶಸ್ವಿಯಾಗಿ ನೆರವೇರಿಸಿದ ಇವರ ಸಾಧನೆಯನ್ನು ಕೊಂಡಾಡಿ ದೇವಸ್ಥಾನದ ಸಮಿತಿಗಳು ಸನ್ಮಾನಿಸಲು ಮುಂದಾದಾಗ, ಸುಜಯ ಶೆಟ್ಟಿ ಅವರು ಅತ್ಯಂತ ವಿನಯದಿಂದಲೇ ಅದನ್ನು ನಿರಾಕರಿಸುತ್ತಾರೆ. “ದೇವರು ನನ್ನನ್ನು ಈ ಪವಿತ್ರ ಕಾರ್ಯದಲ್ಲಿ ತೊಡಗಿಸಿಕೊಳ್ಳಲು ಯೋಗ್ಯನನ್ನಾಗಿ ಮಾಡಿದ್ದಾನೆ, ಅದೇ ದೊಡ್ಡ ಸೌಭಾಗ್ಯ. ದೇವಸ್ಥಾನದ ಆವರಣದಲ್ಲಿ ನಾನು ವೈಯಕ್ತಿಕ ಸನ್ಮಾನ ಸ್ವೀಕರಿಸುವುದಿಲ್ಲ” ಎನ್ನುವ ಇವರ ನಡೆ ಅವರ ಉನ್ನತ ವ್ಯಕ್ತಿತ್ವಕ್ಕೆ ಕನ್ನಡಿಯಾಗಿದೆ.
ಮೂಕ ಪ್ರಾಣಿಗಳ ಮೇಲಿನ ಅಪಾರ ಪ್ರೀತಿ
ವೃತ್ತಿಯಲ್ಲಿ ಕಠಿಣ ಪರಿಶ್ರಮಿಯಾದ ಸುಜಯ ಶೆಟ್ಟಿ ಅವರ ಹೃದಯದಲ್ಲಿ ಪ್ರಕೃತಿ ಮತ್ತು ಪ್ರಾಣಿ-ಪಕ್ಷಿಗಳ ಬಗ್ಗೆ ಅಪಾರ ಪ್ರೀತಿಯಿದೆ. ತಮಗಿರುವ ಪ್ರಾಣಿ ಪ್ರೇಮದಿಂದಾಗಿಯೇ ತೆಳ್ಳಾರು ರಸ್ತೆಯಲ್ಲಿರುವ ತಮ್ಮ 7 ಎಕರೆ ವಿಸ್ತೀರ್ಣದ ಸುಂದರ ತೋಟದಲ್ಲಿ ಸುಸಜ್ಜಿತ ಫಾರ್ಮ್ ಹೌಸ್ ನಿರ್ಮಾಣ ಮಾಡಿದ್ದಾರೆ. ಅಲ್ಲಿ ನೂರಾರು ಮೂಕ ಪ್ರಾಣಿ-ಪಕ್ಷಿಗಳಿಗೆ ಆಶ್ರಯ ನೀಡಿ, ಅವುಗಳನ್ನು ಪ್ರೀತಿಯಿಂದ ಪೋಷಿಸುತ್ತಿದ್ದಾರೆ.
ಸುಪ್ರೀಂ ಕೋರ್ಟ್ ನ್ಯಾಯಾಧೀಶರಿಂದಲೇ ಪ್ರಶಂಸೆ
ಕಾರ್ಕಳದ ಭವ್ಯ ನ್ಯಾಯಾಲಯ ಸಂಕೀರ್ಣದ ಉದ್ಘಾಟನೆಗೆ ಆಗಮಿಸಿದ್ದ ಅಂದಿನ ಸುಪ್ರೀಂ ಕೋರ್ಟ್ ನ್ಯಾಯಾಧೀಶರಾದ ನ್ಯಾಯಮೂರ್ತಿ ಎಸ್. ಅಬ್ದುಲ್ ನಜೀರ್ ಅವರು, ನ್ಯಾಯಾಲಯದ ಅತ್ಯಾಧುನಿಕ ಕಟ್ಟಡ ವಿನ್ಯಾಸ ಹಾಗೂ ಗುಣಮಟ್ಟವನ್ನು ಕಂಡು ಮನಸಾರೆ ಕೊಂಡಾಡಿದ್ದರು. ಕಾಮಗಾರಿಯ ಗುಣಮಟ್ಟಕ್ಕೆ ಮಾರುಹೋದ ಅವರು, ಗುತ್ತಿಗೆ ವಹಿಸಿದ್ದ ಸುಜಯ ಶೆಟ್ಟಿ ಅವರನ್ನು ವೇದಿಕೆಯಲ್ಲಿ ಬಹಿರಂಗವಾಗಿ ಶ್ಲಾಘಿಸಿ ಸನ್ಮಾನಿಸಿದ್ದರು.
ಸಂಸ್ಥೆಯ ಪ್ರಮುಖ ಯೋಜನೆಗಳು ಮತ್ತು ವ್ಯಾಪ್ತಿ
ಗುಣಮಟ್ಟಕ್ಕೆ ಹೆಸರಾಗಿರುವ ಎಸ್ಕೆಎಸ್ ಸಂಸ್ಥೆಯು ಕೇವಲ ಕಟ್ಟಡ ನಿರ್ಮಾಣಕ್ಕೆ ಸೀಮಿತವಾಗಿರದೆ ಫ್ಯಾಬ್ರಿಕೇಶನ್ ಹಾಗೂ ಒಳಾಂಗಣ ವಿನ್ಯಾಸದಲ್ಲೂ (Interior Design) ಮುಂಚೂಣಿಯಲ್ಲಿದೆ.
ಡಾ. ಅಂಬೇಡ್ಕರ್ ಸ್ಕೂಲ್ (ಕಳಸ), ಕೆಆರ್ಸಿಆರ್ ಸ್ಕೂಲ್ (ಸೂಲಿಭಾವಿ), ಆಯುಷ್ ಆಸ್ಪತ್ರೆ (ದಾವಣಗೆರೆ), ಕಂಪ್ಲಿ, ಕುರಗೋಡು ಮತ್ತು ಬೈಂದೂರಿನ ಮಿನಿ ವಿಧಾನಸೌಧಗಳು, ಹುಬ್ಬಳ್ಳಿ ಜನತಾ ಬಜಾರ್.
ಮೂಲಸೌಕರ್ಯಗಳು, ವಸತಿ ಶಾಲೆಗಳು, ಪಿಡಬ್ಲ್ಯುಡಿ ಕ್ವಾರ್ಟರ್ಸ್, ಜಡ್ಜ್ ಕ್ವಾರ್ಟರ್ಸ್, ಐಷಾರಾಮಿ ವಸತಿ ಅಪಾರ್ಟ್ಮೆಂಟ್ಗಳು, ವಾಣಿಜ್ಯ ಸಂಕೀರ್ಣಗಳು, ರಸ್ತೆಗಳು, ವೆಂಟೆಡ್ ಅಣೆಕಟ್ಟುಗಳು, ಬೃಹತ್ ಸೇತುವೆಗಳು ಮತ್ತು ಪ್ರತಿಷ್ಠಿತ ಶಿಕ್ಷಣ ಸಂಸ್ಥೆಗಳ ಕಟ್ಟಡಗಳು.
ಮೆಗಾ ಪ್ರಾಜೆಕ್ಟ್ ಬೆಂಗಳೂರಿನ ವಿಧಾನಸೌಧದ ಬಳಿ ಅತ್ಯಂತ ಮಹತ್ವಾಕಾಂಕ್ಷೆಯಿಂದ ನಿರ್ಮಾಣವಾಗುತ್ತಿರುವ ಪ್ರತಿಷ್ಠಿತ ಸ್ಫೂರ್ತಿ ಸೌಧ’ದ ನಿರ್ಮಾಣ ಗುತ್ತಿಗೆಯೂ ಇವರಿಗೆ ಲಭಿಸಿದೆ.
ಸರಕಾರಿ ಇಲಾಖೆಗಳ ವಿಶ್ವಾಸಾರ್ಹ ಪಾಲುದಾರ
ಕರ್ನಾಟಕ ಲೋಕೋಪಯೋಗಿ ಇಲಾಖೆ (KPWD), ಕರ್ನಾಟಕ ವಸತಿ ಶಿಕ್ಷಣ ಸಂಸ್ಥೆಗಳ ಸಂಘ (KREIS), ಸಣ್ಣ ನೀರಾವರಿ ಇಲಾಖೆ, ಕರ್ನಾಟಕ ಗೃಹ ಮಂಡಳಿ (KHB), ಆರೋಗ್ಯ ಇಲಾಖೆ, ಶಿಕ್ಷಣ ಇಲಾಖೆ, ಸ್ಮಾರ್ಟ್ ಸಿಟಿ ಯೋಜನೆಗಳು (ಮಂಗಳೂರು, ಹುಬ್ಬಳ್ಳಿ, ಶಿವಮೊಗ್ಗ, ದಾವಣಗೆರೆ), ಕಾವೇರಿ ನೀರಾವರಿ ನಿಗಮ (CNNL) ಮತ್ತು ರಾಜೀವ್ ಗಾಂಧಿ ಹೌಸಿಂಗ್ ಕಾರ್ಪೊರೇಷನ್ ಮುಂತಾದ ಉನ್ನತ ಸರಕಾರಿ ಸಂಸ್ಥೆಗಳು ಇವರ ಕಾರ್ಯಕ್ಷಮತೆಗೆ ಸಾಕ್ಷಿಯಾಗಿವೆ. ಕರ್ನಾಟಕ ಮಾತ್ರವಲ್ಲದೆ ಮುಂಬೈ ಮತ್ತು ರಾಜಸ್ಥಾನ ರಾಜ್ಯಗಳಿಗೂ ಎಸ್ಕೆಎಸ್ ಸಂಸ್ಥೆಯು ತನ್ನ ಕಾಮಗಾರಿಗಳ ವ್ಯಾಪ್ತಿಯನ್ನು ವಿಸ್ತರಿಸಿದೆ.
ಸರಕಾರಿ ಕಾಮಗಾರಿಗಳಿಗೆ ಮಾತ್ರ ಆದ್ಯತೆ ಮತ್ತು ಸುಖಿ ಸಂಸಾರ
ಇತ್ತೀಚಿನ ದಿನಗಳಲ್ಲಿ ಎಸ್ಕೆಎಸ್ ಸಂಸ್ಥೆಯು ದೇವಸ್ಥಾನಗಳ ಪವಿತ್ರ ಕಾರ್ಯಗಳನ್ನು ಹೊರತುಪಡಿಸಿ, ಇನ್ಯಾವುದೇ ಖಾಸಗಿ ವಾಣಿಜ್ಯ ಕಾಮಗಾರಿಗಳನ್ನು ಕೈಗೆತ್ತಿಕೊಳ್ಳುತ್ತಿಲ್ಲ. ಕೇವಲ ಅತ್ಯುನ್ನತ ಗುಣಮಟ್ಟದ ಸರಕಾರಿ ಯೋಜನೆಗಳನ್ನು ಮಾತ್ರ ಯಶಸ್ವಿಯಾಗಿ ನಿರ್ವಹಿಸುತ್ತಿದೆ.
ವೃತ್ತಿಜೀವನದಲ್ಲಿ ಇಷ್ಟೆಲ್ಲಾ ಸಾಧನೆಗೈದರೂ ಸರಳತೆಯ ಸಾಕಾರ ಮೂರ್ತಿಯಾಗಿರುವ ಸುಜಯ ಶೆಟ್ಟಿ ಅವರು, ತಮ್ಮ ಯಶಸ್ಸಿನ ಹಿಂದಿನ ಶಕ್ತಿಯಾಗಿರುವ ಪತ್ನಿ ಅಮೃತಾ ಶೆಟ್ಟಿ ಹಾಗೂ ಪುತ್ರಿಯರಾದ ಸಾಚಿ ಮತ್ತು ಸವ್ಯ ಅವರೊಂದಿಗೆ ಕಾರ್ಕಳದಲ್ಲಿ ಸುಖಿ ಜೀವನ ನಡೆಸುತ್ತಿದ್ದಾರೆ. ಶೂನ್ಯದಿಂದ ಆರಂಭಿಸಿ ಸ್ವಾವಲಂಬನೆಯ ಭವ್ಯ ಸಾಮ್ರಾಜ್ಯ ಕಟ್ಟಿದ ಸುಜಯ ಕುಮಾರ್ ಶೆಟ್ಟಿ ಅವರ ಬದುಕು ಹಾಗೂ ಸಾಧನೆ ಇಂದಿನ ಯುವ ಇಂಜಿನಿಯರ್ಗಳಿಗೆ ಮತ್ತು ಉದ್ಯಮಿಗಳಿಗೆ ದಾರಿದೀಪ.
