ರೀಲ್ಸ್ ದುನಿಯಾ – ಸಾಧಕ ಬಾಧಕ

ಹಿರಿ – ಕಿರಿಯರು, ಎಲ್ಲ ವರ್ಗದ ಜನರು ಇಂದು ಡಿಜಿಟಲೀಕರಣ ವ್ಯವಸ್ಥೆಗೆ ಹೊಂದಿಕೊಳ್ಳುತ್ತಿದ್ದಾರೆ. ಸಾಮಾಜಿಕ ಜಾಲತಾಣಗಳಾದ ವಾಟ್ಸಪ್‌, ಫೇಸ್ಬುಕ್, ರೀಲ್ಸ್, ಇನ್ಸ್ಟಾಗ್ರಾಮ್, ಟಿಕ್ – ಟಾಕ್, ಯೂಟ್ಯೂಬ್ ಹೀಗೆ ಜನ ಮೊಬೈಲ್ ಒಳಗೆ ಹೊಕ್ಕಿರುತ್ತಾರೆ. ಇತ್ತೀಚಿನ ಒಂದು ಸರ್ವೇ ಪ್ರಕಾರ ಭಾರತದಲ್ಲಿ ಪ್ರತಿದಿನ ಒಬ್ಬ ಸರಾಸರಿ 5 ಗಂಟೆ ಮೊಬೈಲ್ ವೀಕ್ಷಣೆಯಲ್ಲಿ ತೊಡಗಿರುತ್ತಾನೆ.
ಇಂದು ರೀಲ್ಸ್ ಎಂಬುವುದು ಸಂಪೂರ್ಣ ಡಿಜಿಟಲ್ ಜಗತ್ತನ್ನು ಚಂಡಮಾರುತದ ತರಹ ಆವರಿಸಿದೆ. ಸೃಜನಶೀಲತೆ, ಅಭಿವ್ಯಕ್ತಿ ಮತ್ತು ಸಂಪರ್ಕಕ್ಕೆ ವೇದಿಕೆಯನ್ನು ನೀಡುತ್ತದೆ. ವಿಷಯ ಆಧಾರಿತ ರೀಲ್ಸ್ ಗಳು ತಮ್ಮ ಸೃಜನ ಶೀಲತೆ, ಪ್ರಚಾರ ಮತ್ತು ಉತ್ತಮ ವೇದಿಕೆ ಕಲ್ಪಿಸುತ್ತದೆ. ಅದೇ ರೀತಿ ಕೆಲವೊಂದು ರೀಲ್ಸ್ ಜೀವನಕ್ಕೆ ಮುಳುವಾಗುವಂತಹ ಘಟನೆಗಳು ಕೂಡ ನಡೆದಿದೆ.

ರೀಲ್ಸ್ ಎಂದರೆ ಏನು ?
ರೀಲ್‌ಗಳು ಚಿಕ್ಕದಾದ ವೀಡಿಯೊ ತುಣುಕು (ಕ್ಲಿಪ್‌) ಗಳಾಗಿವೆ (90 ಸೆಕೆಂಡುಗಳವರೆಗೆ), ಬಳಕೆದಾರರು ಇನ್ಸ್ಟಾಗ್ರಾಮ್ ಅಥವಾ ಇತರ ಆಪ್‌ಗಳಲ್ಲಿ ರಚಿಸಬಹುದು, ತನಗೆ ಬೇಕಾದಂತೆ ಎಡಿಟ್ ಮಾಡಿಕೊಳ್ಳಬಹುದು ಮತ್ತು ಹಂಚಿಕೊಳ್ಳಬಹುದು, ಜೊತೆಗೆ ಸಂಗೀತ, ತಮ್ಮ ಕೌಶಲ್ಯ ಮತ್ತು ಸೃಜನಶೀಲ ಪರಿಕರಗಳ ಮೂಲಕ ಪ್ರಸ್ತುತಪಡಿಸಿ ಪ್ರೇಕ್ಷಕರೊಂದಿಗೆ ಸಂಪರ್ಕ ಸಾಧಿಸಲು ಮೋಜಿನ ಮತ್ತು ಆಕರ್ಷಕವಾದ ಮಾರ್ಗವನ್ನು ನೀಡುತ್ತದೆ.
ಆದರೆ, ಇತ್ತೀಚಿನ ದಿನಗಳಲ್ಲಿ ರೀಲ್ಸ್ ಗೀಳು ಮಕ್ಕಳು, ಯುವ ಜನತೆಯ ಮೇಲೆ ಬಹಳಷ್ಟು ಒಳ್ಳೆಯ ಹಾಗೂ ಕೆಟ್ಟ ಪರಿಣಾಮಗಳನ್ನೂ ಬೀರಿದೆ. ಕೆಲವೊಬ್ಬರು ತಮ್ಮ ಮನೆಯವರನ್ನೇ ಸೇರಿಸಿಕೊಂಡು ರೀಲ್ಸ್ ಮಾಡಿ ಮನರಂಜನೆ ನೀಡುತ್ತಾರೆ. ಹೆಚ್ಚಾಗಿ ತಮಾಷೆ, ಅಡುಗೆ, ಊಟ, ದಿನನಿತ್ಯದ ಕೆಲಸಗಳು, ಮನೆ ಮಂದಿಯ ಜೊತೆಗಿನ ಹರಟೆ, ತಮಾಷೆ ಪ್ರಸಂಗಗಳು, ಗಂಡ ಹೆಂಡಿರ ಸರಸ, ವಿರಸ, ಜಗಳ, ಊರಿನ ಸ್ಥಳ ಪರಿಚಯ, ಕ್ರಿಕೆಟ್, ಸಿನಿಮಾ, ಹಾಡು, ನೃತ್ಯ, ಔದ್ಯೋಗಿಕ, ವ್ಯಾಪಾರ, ಸಾಂಸ್ಕೃತಿಕ, ದೇವಸ್ಥಾನ, ರಾಜಕೀಯ ವಿಡಂಬನೆ ಹೀಗೆ ಹತ್ತು ಹಲವು ವಿಚಾರಗಳನ್ನು ಇಟ್ಟುಕೊಂಡು ರೀಲ್ಸ್ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಹಾಗೂ ಮೊಬೈಲ್ ಮೂಲಕ ಹರಿಬಿಟ್ಟು ತಮ್ಮ ಸೃಜನಶೀಲತೆಯನ್ನು ಪ್ರದರ್ಶಿಸಿ ಸಮಾಜದಲ್ಲಿ ಖ್ಯಾತರಾಗುತ್ತಾರೆ.
ಕಾರ್ಕಳದ ಶ್ರದ್ಧಾ, ಕುಂದಾಪುರದ ಗಣೇಶ್ ಕಾರಂತ್, ಪುತ್ತೂರಿನ ಧನರಾಜ್ ಆಚಾರ್,ಇನ್ನೂ ಹತ್ತು ಹಲವು ಮಂದಿ ರೀಲ್ಸ್ ಮೂಲಕ ಪ್ರಖ್ಯಾತಿಗಳಿಸಿರುವುದು ನಮ್ಮ ಕಣ್ಣ ಮುಂದಿದೆ. ಕೆಲವೊಂದು ವಿಷಯಾಧಾರಿತ ರೀಲ್ಸ್ ಗಳು ಉತ್ತಮ ಸಂದೇಶದ ಜೊತೆಗೆ ಮನೆ ಮಂದಿಗೆಲ್ಲ ಮನರಂಜನೆ ನೀಡಿ ದಿನವಿಡೀ ದಣಿದ ಜೀವಗಳಿಗೆ ಸ್ವಲ್ಪ ಖುಷಿ ನೀಡುತ್ತಿದೆ. ಕೆಲವೊಬ್ಬರಿಗೆ ತಮ್ಮ ಸೃಜನಶೀಲತೆ ವ್ಯಕ್ತಪಡಿಸಲು ಉತ್ತಮ ಅವಕಾಶ, ಉತ್ತೇಜನ ನೀಡುತ್ತದೆ. ಸದಭಿರುಚಿಯ ರೀಲ್ಸ್ ಗಳು ವೇಗವಾಗಿ ಪ್ರಚಾರ ಗಿಟ್ಟಿಸುತ್ತದೆ.

ಆದರೆ ಕೆಲವೊಬ್ಬರು, ತಮಾಷೆಗಾಗಿ ನಮ್ಮ ಸಂಸ್ಕೃತಿ, ಸಂಸ್ಕಾರ, ಮಾನವೀಯ ಮೌಲ್ಯಗಳನ್ನು, ಸಾಮಾಜಿಕ ಕಳಕಳಿ ಎಲ್ಲವನ್ನೂ ಗಾಳಿಗೆ ತೂರಿ, ನೋಡಲು ಅಸಭ್ಯ, ಅಶ್ಲೀಲ, ಬೆಡ್ರೂಮ್ ದ್ರಶ್ಯಗಳನ್ನು ಸಹಿತ ರೀಲ್ಸ್ ನೆಪದಲ್ಲಿ ಚಿತ್ರೀಕರಿಸಿ ಯಾವುದೇ ಮುಜುಗರವಿಲ್ಲದೇ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟು ಲಕ್ಷಗಟ್ಟಲೆ ಲೈಕ್ಸ್ ಮತ್ತು ವೀವ್ಸ್ ಗಳಿಂದ ಪ್ರಚಾರ ಗಿಟ್ಟಿಸಿಕೊಳ್ಳುತ್ತಾರೆ. ಆದರೆ ಇದರಿಂದ ಏನು ಪ್ರಯೋಜನ ?

ಕೇವಲ ರೀಲ್ಸ್ ಹುಚ್ಚಿಗೆ ಜೋತು ಬಿದ್ದು ಕೆಲವೊಬ್ಬರ ದಾಂಪತ್ಯದಲ್ಲಿ ಬಿರುಕು ಕಂಡ ನಿದರ್ಶನವೂ ಇದೆ. ತನ್ನ ಸ್ನೇಹಿತರ ಜೊತೆಗೂಡಿ ಹೆಂಡತಿಯೇ ತನ್ನ ಗಂಡನನ್ನೇ ಅಥವಾ ಗಂಡ ಹೆಂಡತಿಯನ್ನೇ ಕೊಂದಿದ್ದು, ಚಲಿಸುವ ರೈಲಿನಲ್ಲಿ ರೀಲ್ಸ್ ಮಾಡಲು ಹೋಗಿ ಅಪಘಾತವಾಗಿ ಪ್ರಾಣ ಕಳೆದುಕೊಂಡಿದ್ದು, ಹರಿಯುವ ನೀರು, ಜಲಪಾತದಲ್ಲಿ ಕೊಚ್ಚಿ ಹೋಗಿದ್ದು, ಜನನಿಬಿಡ ಪ್ರದೇಶದಲ್ಲಿ ಬೈಕ್ ಸ್ಟಂಟ್ ಮಾಡಿ ಬಿದ್ದು ತನ್ನ ಪ್ರಾಣದ ಜೊತೆಗೆ ಇತರರ ಪ್ರಾಣಕ್ಕೂ ಅಪಾಯ ತಂದಿದ್ದು, ಅತಿಯಾದ ಒಡವೆ, ಪಿಸ್ತೂಲ್, ತಲವಾರು ಇತ್ಯಾದಿಗಳೊಂದಿಗೆ ರೀಲ್ಸ್ ಮಾಡಿ ಜೈಲು ಸೇರಿದ ವರದಿಗಳನ್ನು ನಾವು ನೋಡುತ್ತೇವೆ. ಸಮಾಜದ ಸಾಮರಸ್ಯ ಹಾಳುಗೆಡವುವಂತಹ ವಿಕೃತ ಮನಸ್ಸಿಂದ ರೀಲ್ಸ್ ಮಾಡಿರುವುದೂ ನಮ್ಮ ಕಣ್ಣ ಮುಂದಿದೆ.
ಕೆಲವೊಂದು ಸಾರಿ, ಸೆಲೆಬ್ರೆಟಿಗಳ, ಸಿನಿಮಾ ನಟ – ನಟಿಯರ, ರಾಜಕೀಯ ಮುಖಂಡರ ಬೇರೆ ಬೇರೆ ಭಾಷಣ, ಹಾಡು, ತಮಾಷೆಯ ದೃಶ್ಯಗಳನ್ನು ಎಡಿಟ್ ಮಾಡಿ , ರೀಲ್ಸ್ ಮಾಡಿ ಅವರ ಮಾನ ಹರಾಜು ಹಾಕಿದ ಸಂಗತಿಗಳನ್ನು ಕೂಡ ನಾವು ನಿತ್ಯ ಸಾಮಾಜಿಕ ಜಾಲತಾಣ ಗಳಲ್ಲಿ ಕಾಣುತ್ತೇವೆ. ಇದೆಲ್ಲ ಬಹಳ ಅಪಾಯಕಾರಿ ಅಂಶಗಳು, ಇದರಿಂದ ಯಾವುದೇ ಪ್ರಯೋಜನವಿಲ್ಲ. ಇದಕ್ಕೆಲ್ಲ ಕಡಿವಾಣ ಹಾಕಬೇಕಾಗಿದೆ. ಕಾನೂನಿನಲ್ಲಿ ಯಾವ ರೀತಿಯ ಶಿಕ್ಷೆಯಾಗುತ್ತೆ ಅದರ ಬಗ್ಗೆ ಜನರಿಗೆ ಸಾಮಾಜಿಕ ಅರಿವು ಮೂಡಿಸಬೇಕಾಗಿದೆ.

ದೈನಂದಿನ ಜೀವನದಲ್ಲಿ ಮತ್ತು ವೃತ್ತಿಜೀವನಕ್ಕೆ ವರವೋ ಅಥವಾ ಶಾಪವೋ ?
ರೀಲ್ಸ್‌ ಮನರಂಜನೆ ಮತ್ತು ಸಂಪರ್ಕವನ್ನು ಸಾಧಿಸಲು ಸುಲಭ ಸಾಧ್ಯ ನಿಜ. ಆದರೆ ಅತಿಯಾದ ಬಳಕೆಯು ಕಡಿಮೆ ಉತ್ಪಾದಕತೆ, ಮಾನಸಿಕ ಆರೋಗ್ಯ ಸಮಸ್ಯೆಗಳು ಮತ್ತು ವಾಸ್ತವದ ವಿಕೃತ ದೃಷ್ಟಿಕೋನಕ್ಕೆ ಕಾರಣವಾಗಬಹುದು, ಅವುಗಳ ಬಳಕೆಯಲ್ಲಿ ಸಮತೋಲನ ಅವಶ್ಯ.

ಉತ್ತಮ ಅಂಶಗಳು
ರೀಲ್ಸ್‌ ತ್ವರಿತ, ಆಕರ್ಷಕವಾದ ಮನರಂಜನೆಯನ್ನು ಒದಗಿಸುತ್ತವೆ ಮತ್ತು ಬಳಕೆದಾರರಿಗೆ ಸ್ನೇಹಿತರು, ಕುಟುಂಬ ಮತ್ತು ಸಮುದಾಯಗಳೊಂದಿಗೆ ಸಂಪರ್ಕ ಸಾಧಿಸಲು ಅನುವು ಮಾಡಿಕೊಡುತ್ತವೆ. ಅವು ತ್ವರಿತ ಕಲಿಕೆ, ವಿವಿಧ ವಿಷಯಗಳ ಮಾಹಿತಿಯ ಮೂಲವಾಗಿರಬಹುದು. ರೀಲ್ಸ್ ವೈಯಕ್ತಿಕ ಬ್ರ್ಯಾಂಡಿಂಗ್ಗೆ ಅದ್ಭುತ ಸಾಧನವಾಗಬಹುದು. ನಿಮ್ಮ ಪರಿಣತಿ, ಸೃಜನಶೀಲತೆ ಮತ್ತು ವಿಶಿಷ್ಟ ವ್ಯಕ್ತಿತ್ವವನ್ನು ವ್ಯಕ್ತಪಡಿಸಲು ಮತ್ತು ತಮ್ಮ ಪ್ರತಿಭೆಯನ್ನು ಇತರರೊಂದಿಗೆ ಹಂಚಿಕೊಳ್ಳಲು ರೀಲ್ಸ್ ಒಂದು ವೇದಿಕೆ ಉತ್ತಮ ವೇದಿಕೆ. ಸೃಷ್ಟಿಕರ್ತರು ಮತ್ತು ವ್ಯವಹಾರಗಳಿಗೆ, ರೀಲ್ಸ್ ಗೋಚರತೆ ಹೆಚ್ಚಿಸುತ್ತದೆ, ಹೆಚ್ಚಿನ ಪ್ರೇಕ್ಷಕರನ್ನು ನಿರ್ಮಿಸಲು ಸಹಾಯ ಮಾಡುತ್ತದೆ. ರೀಲ್ಸ್‌ ಹಂಚಿಕೆಯ ಆಸಕ್ತಿಗಳು ಮತ್ತು ಹವ್ಯಾಸಗಳ ಸುತ್ತ ಸಮುದಾಯದ ಪ್ರಜ್ಞೆಯನ್ನು ಬೆಳೆಸಬಲ್ಲವು.

ರೀಲ್‌ಗಳ ಕೆಟ್ಟ ಅಂಶಗಳು
ರೀಲ್ಸ್‌ ಸಣ್ಣ-ರೂಪ, ವೇಗದ-ಗತಿಯ ಸ್ವಭಾವವು ಸಮಯ ವ್ಯರ್ಥಕ್ಕೆ ಕಾರಣವಾಗಬಹುದು ಮತ್ತು ಪ್ರಮುಖ ಕಾರ್ಯಗಳ ಮೇಲೆ ಗಮನವನ್ನು ಕಡಿಮೆ ಮಾಡಬಹುದು. ಅತಿಯಾದ ರೀಲ್ಸ್‌ ಬಳಕೆಯು ಅಸಮರ್ಪಕತೆ, ಆತಂಕ, ಖಿನ್ನತೆ ಮತ್ತು ಎಫ್ಒಎಂಒ (ಕಳೆದುಹೋಗುವ ಭಯ) ಭಾವನೆಗಳಿಗೆ ಕಾರಣವಾಗಬಹುದು. ರೀಲ್ಸ್‌ ಕ್ಯುರೇಟೆಡ್ ಸ್ವರೂಪವು ಅವಾಸ್ತವಿಕ ನಿರೀಕ್ಷೆಗಳನ್ನು ಮತ್ತು ಹೋಲಿಕೆಗಳನ್ನು ಸೃಷ್ಟಿಸಬಹುದು. ಇದು ಒಬ್ಬರ ಸ್ವಂತ ಜೀವನದ ಬಗ್ಗೆ ಅಸಮಾಧಾನಕ್ಕೆ ಕಾರಣವಾಗುತ್ತದೆ. ನಿರಂತರ ಹರಿವು ಮತ್ತು ಪ್ರಚೋದನೆಗಳು ಅರಿವಿನ ಮಿತಿ ಮೀರಿದ ಹೊರೆ ಮತ್ತು ಏಕಾಗ್ರತೆ ಕಷ್ಟಕ್ಕೆ ಕಾರಣವಾಗಬಹುದು. ಮಲಗುವ ಮೊದಲು ದೀರ್ಘಾವಧಿಯ ಪರದೆಯ ಸಮಯವು ನಿದ್ರೆಯ ಮಾದರಿಗಳನ್ನು ಅಡ್ಡಿಪಡಿಸಬಹುದು. ದೀರ್ಘಾವಧಿಯ ಪರದೆಯ ಸಮಯವು ಕಣ್ಣಿನ ಒತ್ತಡ, ಕುತ್ತಿಗೆ ನೋವು ಮತ್ತು ಇತರ ದೈಹಿಕ ಸಮಸ್ಯೆಗಳಿಗೆ ಕಾರಣವಾಗಬಹುದು. ವೃತ್ತಿಪರರಲ್ಲದ ಅಥವಾ ವಿವಾದಾತ್ಮಕ ವಿಷಯವು ನಿಮ್ಮ ಪ್ರತಿಷ್ಠೆಗೆ ಹಾನಿಯನ್ನುಂಟು ಮಾಡಬಹುದು. ನಿಮ್ಮ ವೃತ್ತಿಜೀವನಕ್ಕೆ ಸ್ಪಷ್ಟವಾದ ಪ್ರಸ್ತುತತೆ ಇಲ್ಲದೆ ಆಗಾಗ್ಗೆ ಪೋಸ್ಟ್ ಮಾಡುವುದು ನಿಮ್ಮ ವೃತ್ತಿಪರ ಚಿತ್ರಣವನ್ನು ದುರ್ಬಲಗೊಳಿಸಬಹುದು. ಸಾಮಾಜಿಕ ಮಾಧ್ಯಮದಲ್ಲಿ ಹೆಚ್ಚು ಗಮನ ಕೇಂದ್ರೀಕರಿಸುವುದರಿಂದ ಸಹೋದ್ಯೋಗಿಗಳು ಅಥವಾ ಉದ್ಯೋಗದಾತರು ನಿಮ್ಮ ಆದ್ಯತೆಗಳನ್ನು ಪ್ರಶ್ನಿಸುವಂತೆ ಮಾಡಬಹುದು. ರೀಲ್ಸ್ ವೃತ್ತಿಜೀವನದ ಪ್ರಬಲ ಸಾಧನವಾಗಿರಬಹುದು ಅಥವಾ ವೃತ್ತಿಪರ ತಪ್ಪು ಹೆಜ್ಜೆಯಾಗಿರಬಹುದು-ನೀವು ಅವುಗಳನ್ನು ಹೇಗೆ ಬಳಸುತ್ತೀರಿ ಎಂಬುದರ ಮೇಲೆ ಎಲ್ಲವೂ ಅವಲಂಬಿತವಾಗಿರುತ್ತದೆ. ನಿಮ್ಮ ಸಾಮಾಜಿಕ ಮಾಧ್ಯಮದ ಉಪಸ್ಥಿತಿಯನ್ನು ನಿಮ್ಮ ವೈಯಕ್ತಿಕ ಬ್ರ್ಯಾಂಡ್ನ ಭಾಗವಾಗಿ ಯೋಚಿಸಿ ಮತ್ತು ಅದು ನೀವು ಆಗಲು ಬಯಸುವ ವೃತ್ತಿಪರರನ್ನು ಪ್ರತಿಬಿಂಬಿಸುತ್ತದೆ ಎಂದು ಖಚಿತಪಡಿಸಿಕೊಳ್ಳಿ. ರೀಲ್ಸ್ ನಿಮ್ಮ ವೃತ್ತಿಜೀವನವನ್ನು ಹೆಚ್ಚಿಸಬಹುದಾದರೂ, ವೈಯಕ್ತಿಕ ಮತ್ತು ವೃತ್ತಿಪರ ವಿಷಯದ ನಡುವೆ ಸ್ಪಷ್ಟವಾದ ಗಡಿಯನ್ನು ಕಾಪಾಡಿಕೊಳ್ಳುವುದು ಬಹಳ ಮುಖ್ಯ. ಇಂದಿನ ಯುವ ಜನತೆ, ರೀಲ್ಸ್ ಮಾಡುವ ಹುಚ್ಚಿಗೆ ಮನರಂಜನೆಯ ಹೆಸರಲ್ಲಿ ಏನೇನೋ ಮಾಡಿ ಸಮಯ ವ್ಯರ್ಥ ಮಾಡಿ ಜೀವನ ಹಾಳುಮಾಡಿಕೊಳ್ಳುವ ಬದಲು ಇತರರಿಗೆ ಮಾದರಿಯಾಗಿಸುವ ಸದಭಿರುಚಿಯ, ಸಾಮಾಜಿಕ ಕಳಕಳಿಯ ಹಾಗೂ ವಿಷಯಾಧಾರಿತ ರೀಲ್ಸ್‌ ಅವರ ವೈಯಕ್ತಿಕ ಬದುಕಿಗೆ ಸಹಕಾರಿ.