ವೀಡಿಯೊ ವೈರಲ್ ಆದ ಬಳಿಕ ವ್ಯಾಪಕ ಆಕ್ರೋಶ
ಶಿರ್ವ: ಸತ್ತ ನಾಯಿಯನ್ನು ಸ್ಕೂಟಿಯ ಹಿಂಭಾಗಕ್ಕೆ ಕಟ್ಟಿಕೊಂಡು ಹೋಗುತ್ತಿರುವ ವೀಡಿಯೊ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿ ಪ್ರಾಣಿಪ್ರಿಯರ ಆಕ್ರೋಶಕ್ಕೆ ಕಾರಣವಾಗಿದೆ. ಶಿರ್ವದಲ್ಲಿ ನಡೆದಿದೆ ಎನ್ನಲಾದ ಈ ಘಟನೆಯಲ್ಲಿ ವ್ಯಕ್ತಿಯೊಬ್ಬ ನಾಯಿಯ ಶವವನ್ನು ಸರಪಳಿಯಿಂದ ಸ್ಕೂಟಿಯ ಹಿಂಭಾಗಕ್ಕೆ ಬಿಗಿದುಕೊಂಡು ಶಿರ್ವದ ಮುಖ್ಯರಸ್ತೆಯಲ್ಲೇ ಹೋಗುತ್ತಿರುವುದು ಕಾಣಿಸುತ್ತಿದೆ. ನಾಯಿಯನ್ನು ಅವನೇ ಕೊಂದಿದ್ದಾನಾ ಅಥವಾ ಸತ್ತ ಬಳಿಕ ಶವವನ್ನು ವಿಲೇವಾರಿ ಮಾಡಲು ಸಾಗಿಸುತ್ತಿದ್ದನಾ ಎಂದು ಗೊತ್ತಾಗಿಲ್ಲ.
ಈ ನಡುವೆ ಈ ವ್ಯಕ್ತಿ ಮಾನಸಿಕ ಅಸ್ವಸ್ಥ ಎಂಬ ಮಾತು ಕೇಳಿಬರುತ್ತಿದೆ. ಮಾನಸಿಕ ಅಸ್ವಸ್ಥನಿಗೆ ವಾಹನ ಕೊಟ್ಟವರು ಯಾರು ಎನ್ನುವುದು ಸ್ಪಷ್ಟವಾಗಿಲ್ಲ. ಆದರೆ ಪ್ರಾಣಿಗಳ ಮೇಲೆ ಅವನು ತೋರಿಸಿ ಕ್ರೌರ್ಯಕ್ಕೆ ವ್ಯಾಪಕ ಖಂಡನೆ ವ್ಯಕ್ತವಾಗಿದೆ. ಪ್ರಾಣಿ ದಯಾ ಸಂಘದವರು ಅವನ ವಿರುದ್ಧ ದೂರು ನೀಡುವ ಚಿಂತನೆಯಲ್ಲಿದ್ದಾರೆ.
