ಕಾರ್ಮಿಕರು,ರಿಕ್ಷಾ ಎಳೆಯುವವರು, ತರಕಾರಿ ಮಾರುವವರು, ದಿನಸಿ ವ್ಯಾಪಾರಿಗಳು ಅತಿಥಿಗಳು
ಹೊಸದಿಲ್ಲಿ : ಗಣರಾಜ್ಯೋತ್ಸವದಂಥ ದೊಡ್ಡ ಕಾರ್ಯಕ್ರಮಗಳಲ್ಲಿ ಮೊದಲ ಸಾಲಿನಲ್ಲಿ ಅತಿ ಗಣ್ಯರು ಆಸೀನರಾಗುವುದು ವಾಡಿಕೆ. ಆದರೆ ಈ ಸಲ ಹೊಸದಿಲ್ಲಿಯಲ್ಲಿ ನಡೆಯಲಿರುಯವ ಗಣ ರಾಜ್ಯೋತ್ಸವ ಸಮಾರಂಭದ ಮೊದಲ ಸಾಲು ಶ್ರಮಜೀವಿಗಳಿಗೆ ಮೀಸಲಾಗಿರುತ್ತದೆ. ಸಾಮಾನ್ಯ ಜನರ ಸಹಭಾಗಿತ್ವ ಥೀಮ್‌ ಅಡಿಯಲ್ಲಿ ಆಯೋಜಿಸಲಾಗುತ್ತಿರುವ ಈ ಬಾರಿಯ ಗಣರಾಜ್ಯೋತ್ಸವ ಪರೇಡ್‌ನಲ್ಲಿ ವೇದಿಕೆ ಮುಂಭಾಗದ ಸಾಲುಗಳನ್ನು ವಿಐಪಿಗಳ ಬದಲಾಗಿ ಶ್ರಮಜೀವಿಗಳಿಗೆ ಮೀಸಲಿಡಲು ನಿರ್ಧರಿಸಲಾಗಿದೆ.
ರಿಕ್ಷಾ ಎಳೆಯುವವರು, ತರಕಾರಿ ಮಾರುವವರು, ದಿನಸಿ ವ್ಯಾಪಾರಿಗಳು ಮತ್ತು ನವೀಕೃತ ಸೆಂಟ್ರಲ್‌ವಿಸ್ತಾ ನಿರ್ಮಾಣದಲ್ಲಿ ಭಾಗಿಯಾದ ಕಾರ್ಮಿಕರು ಹಾಗೂ ಅವರ ಕುಟುಂಬ, ಕರ್ತವ್ಯ ಪಥದ ನಿರ್ವಹಣಾ ಕಾರ್ಮಿಕರಿಗೆ ಮೊದಲ ಸಾಲನ್ನು ಮೀಸಲಿರಿಸಲಾಗಿದೆ. ಇವರು ನಿಜವಾಗಲೂ ಗಣರಾಜ್ಯ ದೇಶದ ಪ್ರತಿನಿಧಿಗಳಾಗಿದ್ದಾರೆ. ಹಾಗಾಗಿ ಈ ಬಾರಿ ಸಾಮಾನ್ಯರಿಗೆ ಈ ಬಾರಿ ಅವಕಾಶ ನೀಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.
ಈ ಬಾರಿ ಗಣರಾಜ್ಯೋತ್ಸವದ ಮುಖ್ಯ ಅತಿಥಿಯಾಗಿ ಈಜಿಫ್ಟ್‌ನ ಅಧ್ಯಕ್ಷ ಅಬೆಲ್‌ ಫತಾಹ್‌ ಅಲ್‌-ಸಿಸಿ ಅವರು ಭಾಗವಹಿಸುತ್ತಿದ್ದಾರೆ. ಇವರೊಂದಿಗೆ ಈಜಿಫ್ಟ್‌ನಿಂದ ಆಗಮಿಸುತ್ತಿರುವ 120 ಮಂದಿಯ ತಂಡ ಸಹ ಭಾಗಿಯಾಗುತ್ತಿದೆ. ಇದು ರಾಜಪಥ ಎಂಬ ಹೆಸರನ್ನು ಕರ್ತವ್ಯ ಪಥ ಎಂದು ಬದಲಾಯಿಸಿದ ಬಳಿಕ ನಡೆಯುತ್ತಿರುವ ಮೊದಲ ಗಣರಾಜ್ಯೋತ್ಸವವಾಗಿದೆ. ಈ ಬಾರಿ ಪರೇಡ್‌ನ ವೇಳೆ ಒದಗಿಸಲಾಗುತ್ತಿದ್ದ ಸೀಟುಗಳನ್ನು 45 ಸಾವಿರಕ್ಕೆ ಇಳಿಕೆ ಮಾಡಲಾಗಿದೆ. ಇದರಲ್ಲಿ 32 ಸಾವಿರ ಸೀಟುಗಳು ಹಾಗೂ ಬೀಟಿಂಗ್‌ ರಿಟ್ರೀಟ್‌ನ ಶೇ.10ರಷ್ಟು ಸೀಟುಗಳು ಆನ್‌ಲೈನ್‌ನಲ್ಲಿ ಲಭ್ಯವಿದೆ.
