ಆಯುರ್ವೇದವು ಕೇವಲ ಚಿಕಿತ್ಸಾ ಪದ್ಧತಿಯಲ್ಲ. ಅದು ಜೀವನ ನಡೆಸುವ ಸಂಪೂರ್ಣ ವಿಜ್ಞಾನ. “ಸ್ವಸ್ಥಸ್ಯ ಸ್ವಾಸ್ಥ್ಯ ರಕ್ಷಣಂ, ಆತುರಸ್ಯ ವಿಕಾರ ಪ್ರಶಮನಂ” – ಅಂದರೆ ಆರೋಗ್ಯವಾಗಿರುವವರ ಆರೋಗ್ಯವನ್ನು ಕಾಪಾಡುವುದು ಮತ್ತು ರೋಗಿಗಳ ರೋಗವನ್ನು ನಿವಾರಿಸುವುದು ಇದರ ಮುಖ್ಯ ಗುರಿ. ಈ ಗುರಿಯನ್ನು ತಲುಪಲು ಆಯುರ್ವೇದವು ಆಹಾರಕ್ಕೇ ಅತ್ಯಂತ ಹೆಚ್ಚಿನ ಪ್ರಾಮುಖ್ಯತೆ ಕೊಡುತ್ತದೆ. ಆಧುನಿಕ ವಿಜ್ಞಾನವು “ವಿಟಮಿನ್” ಎಂದು ಕರೆಯುವ ಪೋಷಕಾಂಶಗಳನ್ನು ಆಯುರ್ವೇದವು ಸಾವಿರಾರು ವರ್ಷಗಳ ಹಿಂದೆಯೇ ಆಹಾರದ ಮೂಲಕ ಗುರುತಿಸಿತ್ತು.
ಟ್ಯಾಬ್ಲೆಟ್ ಮತ್ತು ಕ್ಯಾಪ್ಸುಲ್ ರೂಪದ ಸಿಂಥೆಟಿಕ್ ವಿಟಮಿನ್‌ಗಳ ಯುಗದಲ್ಲಿ ನಾವು ಮರೆತಿರುವ ಸತ್ಯವೇನೆಂದರೆ, ನಮ್ಮ ದೇಹಕ್ಕೆ ಬೇಕಾದ ಎಲ್ಲಾ ವಿಟಮಿನ್‌ಗಳು ಪ್ರಕೃತಿಯಲ್ಲಿ, ನಮ್ಮ ಅಡುಗೆ ಮನೆಯಲ್ಲೇ ಇವೆ. ನೈಸರ್ಗಿಕ ವಿಟಮಿನ್‌ಗಳು ದೇಹಕ್ಕೆ ಸುಲಭವಾಗಿ ಹೀರಿಕೊಳ್ಳುತ್ತವೆ, ಯಾವುದೇ ಅಡ್ಡಪರಿಣಾಮ ಬೀರುವುದಿಲ್ಲ ಮತ್ತು ದೀರ್ಘಕಾಲ ಆರೋಗ್ಯವನ್ನು ಕಾಪಾಡುತ್ತವೆ.
- ವಿಟಮಿನ್ ಎಂದರೇನು?
ಆಧುನಿಕ ವಿಜ್ಞಾನದ ಪ್ರಕಾರ ವಿಟಮಿನ್‌ಗಳು ನಮ್ಮ ದೇಹದ ಬೆಳವಣಿಗೆ, ರೋಗ ನಿರೋಧಕ ಶಕ್ತಿ, ಚಯಾಪಚಯ ಕ್ರಿಯೆಗೆ ಅಗತ್ಯವಾದ ಸೂಕ್ಷ್ಮ ಪೋಷಕಾಂಶಗಳು. ಆದರೆ ಆಯುರ್ವೇದ ಇದನ್ನು “ಪ್ರಾಣ”, “ಓಜಸ್” ಮತ್ತು “ಧಾತು ಪೋಷಣ” ದೃಷ್ಟಿಯಿಂದ ನೋಡುತ್ತದೆ.
ಆಯುರ್ವೇದದಲ್ಲಿ 7 ಧಾತುಗಳಿವೆ: ರಸ, ರಕ್ತ, ಮಾಂಸ, ಮೇದ, ಅಸ್ಥಿ, ಮಜ್ಜಾ, ಶುಕ್ರ. ನಾವು ತಿನ್ನುವ ಆಹಾರವು ಮೊದಲು ರಸಧಾತುವಾಗಿ ಪರಿವರ್ತನೆಯಾಗಿ, ಕ್ರಮೇಣ ಎಲ್ಲಾ ಧಾತುಗಳನ್ನು ಪೋಷಿಸುತ್ತದೆ. ವಿವಿಧ ಆಹಾರಗಳಲ್ಲಿರುವ ವಿಟಮಿನ್‌ಗಳು ಮತ್ತು ಖನಿಜಗಳು ಈ ಧಾತುಗಳನ್ನು ಬಲಪಡಿಸುವ ಕೆಲಸ ಮಾಡುತ್ತವೆ. ಜೀರ್ಣಾಗ್ನಿ ಚೆನ್ನಾಗಿದ್ದರೆ ಮಾತ್ರ ಆಹಾರದಲ್ಲಿರುವ ವಿಟಮಿನ್ ನಮ್ಮ ದೇಹಕ್ಕೆ ಸಿಗುತ್ತದೆ. ಅದಕ್ಕಾಗಿಯೇ ಆಯುರ್ವೇದ “ಅಗ್ನಿ”ಗೆ ಅಷ್ಟು ಮಹತ್ವ ಕೊಡುತ್ತದೆ. - ಪ್ರಮುಖ ನೈಸರ್ಗಿಕ ವಿಟಮಿನ್‌ಗಳು, ಅವುಗಳ ಮೂಲಗಳು ಮತ್ತು ಆಯುರ್ವೇದ ಉಪಯೋಗ-
*ವಿಟಮಿನ್ A – ಚಕ್ಷುಷ್ಯ ಮತ್ತು ತ್ವಚಾ ರಕ್ಷಕ
ಇದು ಕಣ್ಣು, ಚರ್ಮದ ಆರೋಗ್ಯಕ್ಕೆ ಅಗತ್ಯ. ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ.
ನೈಸರ್ಗಿಕ ಮೂಲಗಳು: ಕ್ಯಾರೆಟ್, ಸಿಹಿ ಗೆಣಸು, ಕುಂಬಳಕಾಯಿ, ಪಾಲಕ್, ಮೆಂತೆ, ಕೊತ್ತಂಬರಿ ಸೊಪ್ಪು, ಮಾವು, ಪಪ್ಪಾಯಿ, ತುಪ್ಪ, ಹಸುವಿನ ಹಾಲು.ವಿಟಮಿನ್ A ಕೊಬ್ಬಿನಲ್ಲಿ ಕರಗುವ ಗುಣ ಹೊಂದಿದೆ. ಅದಕ್ಕಾಗಿ ತುಪ್ಪ ಅಥವಾ ಎಣ್ಣೆಯೊಂದಿಗೆ ಬೇಯಿಸಿದ ತರಕಾರಿ ತಿನ್ನಬೇಕು. ರಾತ್ರಿ ಮಲಗುವ ಮುನ್ನ ಅರ್ಧ ಚಮಚ ತುಪ್ಪ ಕುಡಿಯುವುದರಿಂದ ಕಣ್ಣಿನ ಆರೋಗ್ಯ ಮತ್ತು ಚರ್ಮದ ಹೊಳಪು ಹೆಚ್ಚುತ್ತದೆ. ತ್ರಿಫಲಾ ನೀರಿನಿಂದ ಕಣ್ಣು ತೊಳೆಯುವುದು ಕೂಡ ಉತ್ತಮ.
*ವಿಟಮಿನ್ B ಕಾಂಪ್ಲೆಕ್ಸ್ –
B1, B2, B3, B6, B12 ಇವೆಲ್ಲವೂ ನರಗಳ ಆರೋಗ್ಯ, ಜೀರ್ಣಕ್ರಿಯೆ ಮತ್ತು ಶಕ್ತಿ ಉತ್ಪಾದನೆಗೆ ಸಹಾಯ ಮಾಡುತ್ತವೆ. ಆಯಾಸ, ಕಿರಿಕಿರಿ, ನಿದ್ರಾಹೀನತೆ, ಜ್ಞಾಪಕ ಶಕ್ತಿ ಕಡಿಮೆಯಾಗಲು B ವಿಟಮಿನ್ ಕೊರತೆಯೇ ಕಾರಣವಾಗಿರಬಹುದು.
ನೈಸರ್ಗಿಕ ಮೂಲಗಳು: ಸಿರಿಧಾನ್ಯಗಳು – ರಾಗಿ, ಜೋಳ, ಸಜ್ಜೆ, ಬರ್ಲಿ. ಬ್ರೌನ್ ರೈಸ್, ಬಾಳೆಹಣ್ಣು, ಅವಕಾಡೊ, ಕಡಲೆ, ಹೆಸರು, ಮೊಳಕೆ ಕಾಳುಗಳು, ಮೊಸರು, ಬಾದಾಮಿ.ಬೆಳಿಗ್ಗೆ ಉಪಹಾರಕ್ಕೆ ರಾಗಿ ಗಂಜಿ ಅಥವಾ ರಾಗಿ ಮುದ್ದೆ ಅತ್ಯುತ್ತಮ. ರಾಗಿಯಲ್ಲಿ B ವಿಟಮಿನ್ ಜೊತೆಗೆ ಕ್ಯಾಲ್ಸಿಯಂ ಮತ್ತು ಕಬ್ಬಿಣವೂ ಹೇರಳವಾಗಿದೆ. ಮೊಳಕೆ ಬರಿಸಿದ ಹೆಸರು ಮತ್ತು ಕಡಲೆಯನ್ನು ಉಪಹಾರದಲ್ಲಿ ಸೇರಿಸುವುದರಿಂದ ದಿನವಿಡೀ ಚಟುವಟಿಕೆಯಿಂದ ಇರಬಹುದು.
*ವಿಟಮಿನ್ C – ಓಜಸ್ ವರ್ಧಕ
ಆಯುರ್ವೇದದಲ್ಲಿ “ಓಜಸ್” ಎಂದರೆ ನಮ್ಮ ರೋಗ ನಿರೋಧಕ ಶಕ್ತಿ ಮತ್ತು ಜೀವಶಕ್ತಿ. ವಿಟಮಿನ್ C ಓಜಸ್ ಅನ್ನು ಹೆಚ್ಚಿಸಿ, ಗಾಯಗಳನ್ನು ಬೇಗ ವಾಸಿ ಮಾಡುತ್ತದೆ.
ನೈಸರ್ಗಿಕ ಮೂಲಗಳು- ನೆಲ್ಲಿಕಾಯಿ, ಕಿತ್ತಳೆ, ನಿಂಬೆ, ಮಾವು, ಸ್ಟ್ರಾಬೆರಿ, ಟೊಮೆಟೊ, ಕ್ಯಾಪ್ಸಿಕಂ, ಬ್ರೊಕೋಲಿ. ಒಂದು ನೆಲ್ಲಿಕಾಯಿಯಲ್ಲಿ ಸುಮಾರು 20 ಕಿತ್ತಳೆ ಹಣ್ಣಿಗೆ ಸಮಾನವಾದ ವಿಟಮಿನ್ C ಇರುತ್ತದೆ. ಪ್ರತಿದಿನ ಬೆಳಿಗ್ಗೆ ಖಾಲಿ ಹೊಟ್ಟೆಗೆ 1 ನೆಲ್ಲಿಕಾಯಿ ತಿನ್ನುವುದು ಅಥವಾ ನೆಲ್ಲಿಕಾಯಿ ಪುಡಿಯನ್ನು ಜೇನಿನೊಂದಿಗೆ ತೆಗೆದುಕೊಳ್ಳುವುದು. ಚಳಿಗಾಲದಲ್ಲಿ ಚ್ಯವನಪ್ರಾಶ್ ಸೇವನೆ ಅತ್ಯುತ್ತಮ. ಅರಿಶಿನ ಮತ್ತು ಶುಂಠಿ ಚಹಾದಲ್ಲಿ ನಿಂಬೆ ಹಿಂಡಿ ಕುಡಿಯುವುದರಿಂದ ಶೀತ, ಕೆಮ್ಮು ಬೇಗ ಕಡಿಮೆಯಾಗುತ್ತದೆ.
*ವಿಟಮಿನ್ D –
ಇದು ಕ್ಯಾಲ್ಸಿಯಂ ಹೀರಿಕೊಳ್ಳಲು ಸಹಾಯ ಮಾಡಿ, ಮೂಳೆ ಮತ್ತು ಹಲ್ಲುಗಳನ್ನು ಬಲಪಡಿಸುತ್ತದೆ. ಖಿನ್ನತೆ ಕಡಿಮೆ ಮಾಡಲೂ ಸಹಾಯ ಮಾಡುತ್ತದೆ.
ನೈಸರ್ಗಿಕ ಮೂಲಗಳು- ಬೆಳಿಗ್ಗಿನ 7 ರಿಂದ 9 ಗಂಟೆಯ ಸೂರ್ಯನ ಬೆಳಕು 20 ನಿಮಿಷ, ತುಪ್ಪ, ಮೊಟ್ಟೆ, ಅಣಬೆ, ಮೀನು. ಆಯುರ್ವೇದ “ಸೂರ್ಯ ನಮಸ್ಕಾರ” ಮತ್ತು ಬೆಳಿಗ್ಗಿನ ನಡಿಗೆಯನ್ನು ಒತ್ತಿ ಹೇಳುತ್ತದೆ. ಬರಿಗಾಲಿನಲ್ಲಿ ಹಸಿರು ಹುಲ್ಲಿನ ಮೇಲೆ ನಡೆಯುವುದರಿಂದ D ವಿಟಮಿನ್ ಜೊತೆಗೆ ಮಾನಸಿಕ ಶಾಂತಿಯೂ ಸಿಗುತ್ತದೆ. ವಾರಕ್ಕೆ 2 ಬಾರಿ ತಲೆಗೆ ಮತ್ತು ದೇಹಕ್ಕೆ ಎಣ್ಣೆ ಮಸಾಜ್ ಮಾಡುವುದರಿಂದ ಮೂಳೆಗಳು ಬಲಗೊಳ್ಳುತ್ತವೆ.
*ವಿಟಮಿನ್ E –
ಇದು ಪ್ರಬಲ ಆಂಟಿಆಕ್ಸಿಡೆಂಟ್. ಚರ್ಮದ ವಯಸ್ಸಾಗುವಿಕೆಯನ್ನು ತಡೆಯುತ್ತದೆ, ಕೂದಲನ್ನು ಆರೋಗ್ಯವಾಗಿಡುತ್ತದೆ.
ನೈಸರ್ಗಿಕ ಮೂಲಗಳು- ಬಾದಾಮಿ, ಗೋಡಂಬಿ, ವಾಲ್‌ನಟ್, ಸೂರ್ಯಕಾಂತಿ ಬೀಜ, ಪಾಲಕ್, ಆವಕಾಡೊ, ತೆಂಗಿನ ಎಣ್ಣೆ. ರಾತ್ರಿ 5-6 ಬಾದಾಮಿಯನ್ನು ನೀರಿನಲ್ಲಿ ನೆನೆಸಿ, ಬೆಳಿಗ್ಗೆ ಸಿಪ್ಪೆ ತೆಗೆದು ತಿನ್ನಿ. ತೆಂಗಿನ ಎಣ್ಣೆಯಿಂದ ತಲೆ ಮತ್ತು ದೇಹಕ್ಕೆ ಮಸಾಜ್ ಮಾಡುವುದರಿಂದ ಚರ್ಮದ ತೇವಾಂಶ ಮತ್ತು ಕೂದಲಿನ ಹೊಳಪು ಹೆಚ್ಚುತ್ತದೆ.
*ವಿಟಮಿನ್ K – ರಕ್ತ ಹೆಪ್ಪುಗಟ್ಟುವಿಕೆಗೆ ಅಗತ್ಯ.
ಗಾಯವಾದಾಗ ರಕ್ತಸ್ರಾವ ನಿಲ್ಲಿಸಲು ಮತ್ತು ಮೂಳೆಗಳ ಆರೋಗ್ಯಕ್ಕೆ ಬೇಕು.
ನೈಸರ್ಗಿಕ ಮೂಲಗಳು- ಹಸಿರು ಎಲೆಗಳ ತರಕಾರಿ – ಪಾಲಕ್, ಮೆಂತೆ, ಕೋಸು, ಬ್ರೊಕೋಲಿ. ಮೊಸರು ಮತ್ತು ತುಪ್ಪದಲ್ಲೂ ಸ್ವಲ್ಪ ಪ್ರಮಾಣದಲ್ಲಿ ಇರುತ್ತದೆ.
3. ಆಯುರ್ವೇದ ಪ್ರಕಾರ ವಿಟಮಿನ್‌ಗಳನ್ನು ಪಡೆಯುವ 5 ಪ್ರಮುಖ ನಿಯಮಗಳು
- ಋತುಚರ್ಯೆ ಅನುಸರಿಸಿ: ಪ್ರತೀ ಋತುವಿನಲ್ಲಿ ದೇಹಕ್ಕೆ ಬೇರೆ ಬೇರೆ ವಿಟಮಿನ್ ಬೇಕು.
ಬೇಸಿಗೆ: ನೆಲ್ಲಿಕಾಯಿ, ನಿಂಬೆ, ಸೌತೆಕಾಯಿ – ವಿಟಮಿನ್ C
ಮಳೆಗಾಲ: ಶುಂಠಿ, ಬೆಳ್ಳುಳ್ಳಿ, ಅರಿಶಿನ – ರೋಗ ನಿರೋಧಕ
ಚಳಿಗಾಲ: ತುಪ್ಪ, ಬಾದಾಮಿ, ಗೋಧಿ, ಖರ್ಜೂರ – ವಿಟಮಿನ್ A, E, B - ಸಮಯಕ್ಕೆ ಸರಿಯಾಗಿ ಊಟ ಮಾಡಿ. ಜೀರ್ಣಾಗ್ನಿ ಮಧ್ಯಾಹ್ನ 12 ರಿಂದ 2 ರವರೆಗೆ ಪ್ರಬಲವಾಗಿರುತ್ತದೆ. ಈ ಸಮಯದಲ್ಲಿ ಹೆಚ್ಚು ಪೌಷ್ಟಿಕ ಆಹಾರ ತಿನ್ನುವುದರಿಂದ ವಿಟಮಿನ್‌ಗಳು ಚೆನ್ನಾಗಿ ಹೀರಿಕೊಳ್ಳುತ್ತವೆ.
- ಸಾತ್ವಿಕ ಮತ್ತು ತಾಜಾ ಆಹಾರ – ಬೇಯಿಸಿದ ತರಕಾರಿಗಿಂತ ಹಸಿ ತರಕಾರಿ ಮತ್ತು ಹಣ್ಣುಗಳಲ್ಲಿ ವಿಟಮಿನ್ ಹೆಚ್ಚು. ಸಾಧ್ಯವಾದಷ್ಟು ಸಂಸ್ಕರಿಸದ, ಸ್ಥಳೀಯ ಆಹಾರ ಸೇವಿಸಿ.
- ಮನಸ್ಸಿನ ಶಾಂತಿ – ಒತ್ತಡದಲ್ಲಿ ದೇಹವು ವಿಟಮಿನ್ B ಮತ್ತು C ಅನ್ನು ಬೇಗ ಖರ್ಚು ಮಾಡುತ್ತದೆ. ಧ್ಯಾನ, ಪ್ರಾಣಾಯಾಮ ಮತ್ತು ಸಾಕಷ್ಟು ನಿದ್ರೆಯಿಂದ ವಿಟಮಿನ್‌ನ ಸದುಪಯೋಗವಾಗುತ್ತದೆ.
ಮನೆಯಲ್ಲೇ ಮಾಡುವ 3 ಆಯುರ್ವೇದ ನೈಸರ್ಗಿಕ ವಿಟಮಿನ್ ಟಾನಿಕ್
- ಇಮ್ಯುನಿಟಿ ಬೂಸ್ಟರ್ ಡ್ರಿಂಕ್-
ಬೇಕಾಗುವು: 1 ಲೋಟ ಬೆಚ್ಚಗಿನ ನೀರು, ಅರ್ಧ ನಿಂಬೆ , ಚಿಟಿಕೆಯಷ್ಟು ಅರಿಶಿನ ಮತ್ತು ಕರಿಮೆಣಸು
ಉಪಯೋಗ: ವಿಟಮಿನ್ C, ಪ್ರತಿರೋಧಕ ಶಕ್ತಿ, ಜೀರ್ಣಕ್ರಿಯೆಗೆ ಉತ್ತಮ. - ಎನರ್ಜಿ ಮತ್ತು B ವಿಟಮಿನ್ ಡ್ರಿಂಕ್-
ಬೇಕಾಗುವು: 1 ಬಾಳೆಹಣ್ಣು, 5 ನೆನೆಸಿದ ಬಾದಾಮಿ, 1 ಚಮಚ ರಾಗಿ ಹಿಟ್ಟು, 1 ಲೋಟ ಹಾಲು
ಉಪಯೋಗ: ಆಯಾಸ ಕಡಿಮೆ ಮಾಡಿ, ನರಗಳ ಆರೋಗ್ಯಕ್ಕೆ ಸಹಾಯ. - ಚರ್ಮ ಮತ್ತು ಕೂದಲಿಗೆ ಟಾನಿಕ್-
ಬೇಕಾಗುವು: 1 ಚಮಚ ನೆಲ್ಲಿಕಾಯಿ ಪುಡಿ, 1 ಚಮಚ ಜೇನು, ಅರ್ಧ ಲೋಟ ನೀರು
ಉಪಯೋಗ: ವಿಟಮಿನ್ C ಮತ್ತು E, ಚರ್ಮದ ಕಾಂತಿ ಮತ್ತು ಕೂದಲು ಉದುರುವಿಕೆ ತಡೆಯಲು.
ನೈಸರ್ಗಿಕ ಆಹಾರದಿಂದ ವಿಟಮಿನ್ ಪಡೆಯುವುದು ಅತ್ಯುತ್ತಮ. ಆದರೆ ಯಾವುದೇ ತೀವ್ರ ಕೊರತೆ ಇದ್ದರೆ ವೈದ್ಯರ ಸಲಹೆಯೊಂದಿಗೆ ಮಾತ್ರ ಸಪ್ಲಿಮೆಂಟ್ ತೆಗೆದುಕೊಳ್ಳಬೇಕು. ಅತಿಯಾದರೆ ಯಾವುದೂ ಒಳ್ಳೆಯದಲ್ಲ. ಆಯುರ್ವೇದ “ಮಿತಾಹಾರ” ವನ್ನು ಒತ್ತಿ ಹೇಳುತ್ತದೆ.ಅಲ್ಲದೆ, ಪ್ರತಿಯೊಬ್ಬರ ದೇಹ ಪ್ರಕೃತಿ ಬೇರೆ. ವಾತ, ಪಿತ್ತ, ಕಫ ದೋಷಕ್ಕೆ ತಕ್ಕಂತೆ ಆಹಾರ ಬದಲಾಗುತ್ತದೆ. ಉದಾ: ವಾತ ಪ್ರಕೃತಿಯವರಿಗೆ ಒಣ ಹಣ್ಣುಗಳು ಹೆಚ್ಚು ಒಳ್ಳೆಯದು, ಪಿತ್ತ ಪ್ರಕೃತಿಯವರಿಗೆ ನೆಲ್ಲಿಕಾಯಿ ಮತ್ತು ತೆಂಗು ಒಳ್ಳೆಯದು.ನಮ್ಮ ಅಜ್ಜಿ-ಅಜ್ಜಂದಿರು ಟ್ಯಾಬ್ಲೆಟ್ ಇಲ್ಲದೆ ಆರೋಗ್ಯವಾಗಿದ್ದರು. ಏಕೆಂದರೆ ಅವರ ಆಹಾರವೇ ಅವರ ಔಷಧಿಯಾಗಿತ್ತು. ಆಯುರ್ವೇದ ನಮಗೆ ಕಲಿಸುವುದು ಇದನ್ನೇ. ಪ್ರಕೃತಿಯಿಂದ ದೂರ ಹೋದಷ್ಟೂ ನಾವು ರೋಗಗಳಿಗೆ ಹತ್ತಿರವಾಗುತ್ತೇವೆ.
ನೆಲ್ಲಿಕಾಯಿ, ರಾಗಿ, ತುಪ್ಪ, ಬಿಸಿಲು – ಇವೆಲ್ಲವೂ ಉಚಿತವಾಗಿ ಸಿಗುವ “ನೈಸರ್ಗಿಕ ಮಲ್ಟಿವಿಟಮಿನ್” ಗಳು. ಇವುಗಳನ್ನು ನಮ್ಮ ದಿನಚರಿಯಲ್ಲಿ ಸೇರಿಸಿಕೊಂಡರೆ ನಾವು ಆರೋಗ್ಯವಾಗಿರಬಹುದು ಮತ್ತು ಔಷಧಿಗಳ ಮೇಲಿನ ಅವಲಂಬನೆ ಕಡಿಮೆ ಮಾಡಬಹುದು.ನಿಮ್ಮ ದೇಹವನ್ನು ಪ್ರೀತಿಸಿ. ಅದಕ್ಕೆ ಪ್ರಕೃತಿ ಕೊಟ್ಟಿರುವ ಅತ್ಯುತ್ತಮ ಉಡುಗೊರೆಯಾದ ನೈಸರ್ಗಿಕ ವಿಟಮಿನ್‌ಗಳನ್ನು ನೀಡಿ. ಏಕೆಂದರೆ “ಆರೋಗ್ಯವೇ ಭಾಗ್ಯ”.
