ವಾಷಿಂಗ್ಟನ್: ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಪೋಪ್ ಲಿಯೋ ವಿರುದ್ಧ ನೀಡಿರುವ ವಿವಾದಾತ್ಮಕ ಹೇಳಿಕೆ ಹಾಗೂ ಸಾಮಾಜಿಕ ಜಾಲತಾಣದಲ್ಲಿ ತಮ್ಮನ್ನು ತಾವೇ ಯೇಸು ಕ್ರಿಸ್ತರಿಗೆ ಹೋಲಿಸಿಕೊಂಡು ಮಾಡಿಕೊಂಡಿರುವ ಪೋಸ್ಟ್ ಅಮೆರಿಕದ ಕ್ರೈಸ್ತ ಸಮುದಾಯದ ಕೆಂಗಣ್ಣಿಗೆ ಗುರಿಯಾಗಿದೆ. ಟ್ರಂಪ್ ಅವರ ಈ ನಡೆ ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿದ್ದು, ದೇಶಾದ್ಯಂತ ವಿವಾದದ ಬಿರುಗಾಳಿ ಎಬ್ಬಿಸಿದೆ.
ವಿವಾದ ತಾರಕಕ್ಕೇರುತ್ತಿದ್ದಂತೆ ಟ್ರಂಪ್ ತಮ್ಮ ಪೋಸ್ಟ್ ಅನ್ನು ಡಿಲೀಟ್ ಮಾಡಿದ್ದಾರಾದರೂ, ಕ್ರೈಸ್ತ ಮುಖಂಡರ ಆಕ್ರೋಶ ಮಾತ್ರ ಶಮನಗೊಂಡಿಲ್ಲ.
ಕ್ಷಮೆಯಾಚನೆಗೆ ಒತ್ತಾಯ
ಅಮೆರಿಕದ ಕ್ಯಾಥೋಲಿಕ್ ಬಿಷಪ್ಗಳ ಸಮ್ಮೇಳನದ (USCCB) ಅಧ್ಯಕ್ಷ ಆರ್ಚ್ ಬಿಷಪ್ ಪಾಲ್ ಕೋಕ್ಲಿ ಅವರು ಟ್ರಂಪ್ ಹೇಳಿಕೆಯನ್ನು ತೀವ್ರವಾಗಿ ಖಂಡಿಸಿದ್ದಾರೆ. “ಇದು ಅತ್ಯಂತ ಅವಮಾನಕರ ಸಂಗತಿ. ಇಂತಹ ಮಾತುಗಳು ಕ್ರೈಸ್ತ ಮೌಲ್ಯಗಳಿಗೆ ಸಂಪೂರ್ಣ ವಿರುದ್ಧವಾಗಿವೆ. ಟ್ರಂಪ್ ಅವರ ಈ ವರ್ತನೆಯಿಂದ ನಾನು ತೀವ್ರ ನಿರಾಶೆಗೊಂಡಿದ್ದೇನೆ” ಎಂದು ಅವರು ಹೇಳಿದ್ದಾರೆ.
ಮಿನ್ನೇಸೋಟ ಮೂಲದ ಬಿಷಪ್ ರಾಬರ್ಟ್ ಬ್ಯಾರನ್ ಕೂಡ ಟ್ರಂಪ್ ವಿರುದ್ಧ ಗುಡುಗಿದ್ದು, “ಅಧ್ಯಕ್ಷರ ಹೇಳಿಕೆಗಳು ಸಂಪೂರ್ಣವಾಗಿ ಅನುಚಿತ ಹಾಗೂ ಅಗೌರವಪೂರ್ಣವಾಗಿವೆ. ಅವರು ತಕ್ಷಣವೇ ಈ ಕುರಿತು ಕ್ಷಮೆಯಾಚಿಸಬೇಕು” ಎಂದು ಒತ್ತಾಯಿಸಿದ್ದಾರೆ.
ನೀವು ದೇವರಲ್ಲ: ಡೇವಿಡ್ ಬ್ರಾಡಿ
ಕ್ರಿಶ್ಚಿಯನ್ ಬ್ರಾಡ್ಕಾಸ್ಟಿಂಗ್ ನೆಟ್ವರ್ಕ್ನ ಪ್ರಮುಖ ನಿರೂಪಕ ಡೇವಿಡ್ ಬ್ರಾಡಿ ಅವರು ‘X’ (ಹಿಂದಿನ ಟ್ವಿಟರ್) ತಾಣದಲ್ಲಿ ಪೋಸ್ಟ್ ಮಾಡಿ, “ಅಧ್ಯಕ್ಷರೇ, ಮೊದಲು ಆ ಪೋಸ್ಟ್ ಅನ್ನು ತೆಗೆದುಹಾಕಿ. ನೀವು ದೇವರಲ್ಲ, ನಮ್ಮಲ್ಲಿ ಯಾರೂ ದೇವರಲ್ಲ. ಇದು ಮಿತಿಯನ್ನು ಮೀರಿದ ವರ್ತನೆ” ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಟ್ರಂಪ್ ಪರ ಸಮರ್ಥನೆ
ಈ ವಿವಾದದ ನಡುವೆಯೂ ಶ್ವೇತಭವನದ ಸಲಹಾ ಮಂಡಳಿಯ ಸದಸ್ಯ ರಾಲ್ಫ್ ರೀಡ್ ಅವರು ಟ್ರಂಪ್ ಬೆನ್ನಿಗೆ ನಿಂತಿದ್ದಾರೆ. “ಅಧ್ಯಕ್ಷರ ಮೇಲಿರುವ ಜನರ ಆಳವಾದ ಬೆಂಬಲ ಇಂತಹ ಸಾಮಾಜಿಕ ಜಾಲತಾಣದ ಪೋಸ್ಟ್ಗಳಿಂದ ಕುಂದುವುದಿಲ್ಲ” ಎಂದು ಹೇಳುವ ಮೂಲಕ ಟ್ರಂಪ್ ನಡೆಯನ್ನು ಸಮರ್ಥಿಸಿಕೊಂಡಿದ್ದಾರೆ.
ಹಿನ್ನೆಲೆ: 2024ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಅಮೆರಿಕದ ಬಹುಪಾಲು ಕ್ಯಾಥೋಲಿಕ್ ಮತದಾರರು ಟ್ರಂಪ್ ಅವರನ್ನು ಬೆಂಬಲಿಸಿದ್ದರು. ಇದೀಗ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತರುವಂತಹ ಹೇಳಿಕೆ ನೀಡಿರುವುದು ಮುಂಬರುವ ದಿನಗಳಲ್ಲಿ ಅವರ ರಾಜಕೀಯದ ಮೇಲೆ ಯಾವ ರೀತಿಯ ಪರಿಣಾಮ ಬೀರಲಿದೆ ಎಂಬುದು ಕುತೂಹಲ ಮೂಡಿಸಿದೆ.
